年近歲晚，大市回吐，但熱炒的科技股、特別是AI股唔肯回吐，顯示大市炒作熱度不低。周五大市跌，AI股智譜(2513)、Minimax(0100)上午仲逆市升10%以上，就知背後有大資金炒作。
內地本周五已是假前最後一個交易日，A股將迎來長達10天的長假休市（2月14日-2月23日），即係下下個星期一先至復市。而港股只是初一至初三(下周二至周四)休市，假期比內地短得多。內地開始有議論，在A股休市的階段，港股都可能走出獨立行情。內地朋友假期手痕，港股有市他們會照樣來炒。
內地甚至有分析港股過去在新年假後的走勢，話港股在農曆年假期後有突然拉升的傳統，話自2021年以來，農曆年期間港股平均上漲2%。從歷史資料看，恒生指數在農曆年前3個交易日上漲概率82%，節後上漲概率在40%至60%。內地分析話，近年來港股的定價邏輯正在發生變化，港股與A股的相關性走強，與美股的相關性走弱，港股存在一定的「被動跟隨」內地上漲的可能性，例如2024、2025年的農曆年假後。
內地分析指，港股科技仍是中長期投資主線，經歷去年末回落後，估值壓力下降，港股科技有望反彈回升。港股科技股與同期A股和海外科技相比，價錢較便宜。截至2月10日，恒生港股通中國科技指數最新市盈率為24.5倍，遠低於內地科創50和納斯達克100指數的市盈率。
據Wind資料，2025年內地南向流入香港資金全年淨流入高達1.4萬億港元，創下歷史紀錄。進入2026年，這一勢頭不減，截至2月6日，內地南向資金從今年開年以來已累計淨流入超1200億港元。可以想像，熱炒的內地科技股，主要玩家都是內地資金。
有股壇老雀近年專炒美股，無乜炒港股，主要因為過去港股似死蛇爛鱔，郁都唔郁。但去年尾他開始炒番本地股票，話今年開始炒港股順手好多，佢形容自己一味好彩，近日智譜、Minimax、長飛光纖光纜(6869)、兆易創新(3986)等都買過，炒咗幾轉，甚有斬獲。
智譜年初至今圖。
長飛光纖光纜年初至今圖。
股壇老雀的經歷說明「有智慧不如趁勢」，而家炒緊內地科技股，跟風炒作容易贏錢。而內地資金炒股有幾個特點:
1. 愛炒板塊輪動。呢兩個星期炒這個板塊，轉個頭已開始炒下一個板塊。近排就係AI股最吃香。
2. 炒新股易衝高。其實即使是過去兩三年無咁旺的市道，內地有名氣的公司來港上市後，很多都會炒一轉，而且衝到天咁高，炒新股勝在無蟹貨，舞上去成本無咁高。
3. 炒作週期短癮，好多股炒一頭半個月就跌番落來，回都回得幾快。你如果入貨價高，升上去無走，回的時候又想睇基本因素，變成睇長線，就好易變長揸股東。在急升市道，股票上升主要由資金流向決定，睇基本因素無用。你睇車股如吉利(0175)基本因素好好，打入全球第七位，但股價唔郁，講乜都無用。
簡單總結，買AI股一日升20%以上，好難日日係咁，所以都要快進快出，唔好對急升股太長情呀。
(如想睇多啲陸羽仁分析大市貼股票，即訂閱「石榴台」，逢周日至周五，日日睇陸羽仁專欄，吼實有乜好股可以投資！)
陸羽仁
** 博客文章文責自負,不代表本公司立場 **
