肥佬黎病

在電郵收到王維基的香港電視網上商場（HKTV Mall）的廣告，開戶送100元購物券， 又睇到港視開台兩個半月收視急挫70%的消息， 港視最新一周收視每日平均點播用戶跌至6萬，直播收視戶9.9萬 ，都為維基哥擔心。

 

小鯊同一個傳媒高人飲茶，佢話維基哥好似有一種肥佬黎病， 一單嘢未搞好，又大力掟水搞第二單嘢，高人舉蘋果速銷做例子， 話肥佬黎當日搞速銷， 第一個月問公司內負責睇數的周安橋蝕蘋果速銷蝕幾多， 周安橋答話唔計開業投資月蝕2000萬，肥佬黎話蝕得唔夠多， 要蝕多啲才可以打開局面，如是者問咗兩個月，虧蝕一路增加， 到第三個月，月蝕3000萬，肥佬黎問數問到呢個月就無問， 盤生意唔掂，肥佬黎就無興趣睇，半年後不聞不問， 又轉去諗第二啲生意。結果蘋果速銷蝕咗15億先至執笠。

高人話後來肥佬黎搞台灣電視都有呢個現象，開始慶恰恰， 但開台半年唔係幾順，攞極都攞唔到牌，肥佬黎又唔想理， 又轉去搞第二啲嘢。佢鐘意打順景波，唔係幾識打逆景波。

高人話而家睇維基哥有類似病狀，港視無電視牌照樣網上開台， 但節目力量未夠，客戶試兩試無料到就走，所以收視回落得咁快。 但港視未搞掂，又開HKTV Mall，若然一個客派100元購物券，100萬客就派咗1億， 但新客嚟攞著數試咗一次，又唔係咁平，貨品又唔係咁特別， 用完著數就無番頭。

維基的算盤係港視無乜廣告，都可以做番HKTV Mall宣傳，問題係港視係唔係一個強勁宣傳平台? 以佢每日6萬點播戶、9.9萬直播戶計，加埋累計都係16萬， 除開1小時真係1個收視點6.5萬人都未夠，少過亞視收視人數， HKTV Mall想做宣傳，每年掟1000萬去亞視做宣傳， 肯定成為亞視最大客戶，真係由朝播到晚都得，多人睇過港視， 但唔使花港視1、2億的年開支，自己搞個台做自己的宣傳， 條數計唔掂喎。

小鯊

** 博客文章文責自負,不代表本公司立場 **

《明報》爆出懷疑自我審查事件，約80個明報員工昨晚舉行「擱筆 1小時」的抗議行動，指責總編輯鍾天祥深夜決定改頭條， 把偵查組報道的獨家新聞「加國密件：學生睹六四開槍」，改為「 阿里巴巴10億助港青創業」。明報員工協會副主席冼韻姬話， 雖然總編輯有權決定頭條，但一貫機制是透過編務會議決定，「 佢冇喺正常機制下做，喺深宵時間突然改咗個頭條， 到底背後發生咗乜嘢事？」

冼韻姬更話，經過今次事件後，佢哋「 好難再信任一個咁樣嘅總編輯」。 據稱明報總編輯鍾天祥缺席昨日下午五時的編務會議， 明報職工協會搵唔到佢對質咁話。

《明報》即時新聞昨日深夜刊登總編輯鍾天祥署名回應， 強調有權力及責任調動版面，指日前將「六四密件」撤換成「 阿里巴巴」作頭條，是按新聞邏輯決定行使權力，並無任何修改「 六四密件」報道，該新聞原文在顯著位置刊出。

行內人話，明報換了大馬人鍾天祥做老總，員工一直反對， 本來已預計爭拗會沒完沒了。 鍾天祥將六四報道頭條改做阿里巴巴頭條，雖然在其他位置照出， 但咁調動應該預咗有爭議，若然決定做，理應準備埋解釋， 好難避免當面和員工講。而且要出聲明，都最好一早出， 唔使搞到咁夜先至回應。

明報又是一個難局，員工唔順一個外來老總，老闆又無打算換人， 變成一個困獸鬥的局面。