亞視集資手法愈來愈騎呢

昨日，亞視管理人德勤公布咗有三個投資者入標想買亞視股份，但都不單是買法庭叫大股東出售的百分之10.75的股份，而是想買百分之40以上的股份，但係三個財團的出價，主要投資者王征都唔滿意，所以成件事又泡湯。

最好笑的係，管理人本來要求每個入標者要俾50萬入標費，結果三間入標者無人願意俾，連收150萬的如意算盤都打唔響，亞視在無錢出糧的前提下，又有新搞作。名媛趙曾學韞話佢曾經在六十年代曾在亞視新聞部做過三年打字員，對亞視好有感情，提出一個計劃，叫市民每人捐1萬元，人人捐錢救亞視，目標係籌到3千萬，買亞視百分之10.75的股份，大股東就會用呢筆錢來出糧。

一聽就知道呢啲建議唔可行，普通亞視睇電視啫，點會出錢買一間搖搖欲墜的公司的股份，有錢不如去炒吓國企股啦，要一人一萬元，籌到3千萬，即係要3千個市民去入股，認股情況咁踴躍，我估只有好強勁的新股先得。

另外，最大的問題係，按法例，超過50個投資者入股的投資計劃，係要俾證監會審批，依家佢哋咁樣募股，其實已經跌入投資計劃範疇，隨時犯埋法添。不過，亞視為咗籌錢出糧，騎呢招都層出不窮，呢個都唔算特別奇怪。

真正的問題係依家有人入股，大股東又吊高來買，自己有錢又唔肯出糧，呢個先係最大的問題，最後咁樣搞吓搞吓逼落去，其實只係逼政府收番佢個牌。

Ariel

** 博客文章文責自負,不代表本公司立場 **

政府昨日公開招聘個人資料私隱專員，擺明唔想與現專員蔣任宏續約。公署發言人表示，到今年8月初蔣任宏的5年任期屆滿，公開招聘屬正常程序。

Ariel就覺得政府若想與蔣續約，咁做就唔太正常啦，唔想續約就正常。 政府不滿蔣任宏源於一件小事。

去年8月私隱專員公署公佈「人對人」直銷電話的公眾意見調查，並建議商務及經濟局規管，其後蔣任宏在其網誌透露，開記者會後收到商經局來信，話對他公佈調查報告方式表示失望及不滿，認為公署應事先與商經局溝通，又對調查結果作出質疑，指商經局無責任作規管建議。

政府中人話，過去這些公營機構有政策建議，發布前事先會和政府溝通，蔣不溝通，事後政府表不滿，他又將不滿公開，咁搞以後都無合作基礎。

雖知私隱專員一職，基本月薪逾20萬元，另有定額的現金津貼及約滿酬金，大把人爭住做，另外請人在情理之中。 睇政府行事方法，對其他公營機構都會慢慢揸硬。

西九行政總裁連納智因家人健康提早退休，但早在去年政府已加強西九管理，西九董事局決定增加營運總裁一職，在年底委任退休房屋局常秘栢志高出任，雖然架構上栢志高要向連納智負責，但栢志高有實權。 一葉知秋，未來其他公營機構，都唔會任由管理層去玩了。