清晨傳來葵涌8號貨櫃碼頭迴旋處發生奪命車禍，2名國泰男機師在「波子」(保時捷跑車)上，失控撞壆被活活燒死，真係令人心痛又惋惜。
係人都知在香港考機師好難，考到入國泰更加要係精英中的精英，兩個死者都係得27歲，放假期間約埋幾個機師，半夜三更走去貨櫃碼頭吹水，姓黃司機突然興起想揸架靚波子去兜風，友人贈興上車，估唔到就咁上咗部「烈火戰車」。
出事的波子Cayman S，馬力325匹、極速283km，聽講行貨車賣成百萬，就算二手都要幾十萬，睇報道同行幾個機師係一人一部靚車，做機師似乎都真係好有米。
Ariel搵番國泰份年報睇吓，睇完真係「哇」一聲，以2013年計（2014年未出），年薪過百萬飛行人員數目成2300幾人，比其他職員只有500幾人年薪過百萬，足足多成三倍幾，最高薪那位飛行人員年薪仲高達450萬至500萬元，勁過好多公司CEO。果2300幾個年薪過百萬的飛行人員中，相信大部份都係機師，所以國泰都有過千名年新過百萬的黃金打工仔機師啦。
難怪做機師係好多後生仔的夢想，著起套機師，即刻「Cool魔」、「Sam哥」上身，人工高社會認知地位又高，真係揸靚車、溝死女。不過，揸得掂飛機唔代表乜都攪得掂，本來後生、叻仔、有錢，前途無限，今次呢單車禍，真係令人好遺憾。
Ariel
** 博客文章文責自負,不代表本公司立場 **
全國人大常委會副秘書長李飛四月來港和泛民會面的安排告吹， 政府消息指泛民聯署重申反對人大8.31決定令會面泡湯。 公民黨湯家驊昨日接受電台訪問承認他是牽線人，如今「枉作小人」 。
Ariel聽聞除了湯大狀之外， 還有不少人不想政改方案被否決政制原地踏步， 都落力遊說阿爺及泛民埋枱傾，但兩邊都咁硬，唔好講話達成協議， 直情傾吓都好難。
至於今次李飛原定來港事件，理念係泛民覺得特區政府話唔到事， 要直接同中央官員傾，所以才有京官來港的構想。 但自然亦有強硬泛民唔想有好結果， 就逼住大家無論同阿爺傾乜都好，但要先講明反對人大8.31決定 的集體立場不變，所以有聯署重申反對8.31的一幕， 搞喎咗件事。
湯家驊透露事件經過，話大約在兩、三個月前， 他安排政務司司長林鄭同泛民代表見面， 然後再想拉京官和泛民見面。湯大狀話，「我睇嘅嘢好簡單， 就算明日重啟五部曲，結果都係一樣，除非大家的思維有改變。 我建議司長安排北京官員見泛民」。及後北京有正面回應， 話希望會面低調私下進行，而且不談撤銷8.31決定， 但其他意見都會聽。
後來在過年前，有泛民公開爆出可能和京官會面的安排， 想低調見面已無可能。另外民主黨主席劉慧卿又公開說如不撤銷8. 31決定就「見都無謂」，又做不到不談撤銷8.31決定， 基本上已達不到阿爺兩點會面要求。最後更關鍵是泛民聯署聲明， 就為事件打下棺材釘。湯大狀話他前天收到官員來電， 話在此氣氛下同京官「唔見好過見」。湯大狀亦嘆一句， 他已不止一次「枉作小人」啦。
