劉進圖掟波贏CY

新聞行政人員協會今晚舉辦聯歡晚宴，特首CY係主禮嘉賓，今屆係DBC數碼廣播電台總裁羅燦燦哥出任主席，各方友好捧場，前幾任主席商台的May姐(陳淑薇)一早講明，為免大家太過勞碌，只玩不寫，等大家玩得開心啲。

不過，有一個遊戲，由CY對世界華文媒體網絡營運總裁劉進圖(Kevin)，大家鬥掟波，又的確係幾有趣，結果兩人同意俾大家報導。

遊戲好簡單，大家掟啲乒乓球反彈入去玻璃杯中，一輪熱身後馬上開始，身型高大的CY當然孔武有力，但係斯斯文文的Kevin掟波技術似乎係好啲。

經過一輪惡戰之後，劉進圖以13:9的大比數勝出，事後CY話已盡力，都係不能取勝，而Kevin就話事前無練，不過可能呢個遊戲唔使用太大力，出手輕柔啲仲容易入到杯中。

現場亦見到蘋果社長葉一堅，堅哥笑笑口話有新老總陳沛敏上場，佢輕鬆好多，最好幫多兩、三個月手，就唔使佢幫手啦，睇嚟佢有啲甩難的感覺。

Ariel

** 博客文章文責自負,不代表本公司立場 **

依家耐唔耐都聽到一啲本來好人好姐的人，無先兆下猝死。昨日在政府發生咁樣的不幸事件。

話說昨日中央投標委員會開會，有好多不同項目放上去批，其中一個項目同水務署有關係，水務署派咗一名官員去解畫。

官員在等開會期間，突然暈倒，事件驚動咗官員，馬上Call本身係醫生的食物及衛生局局長高永文，同一時間即時報警。但高醫生趕落嚟睇時，發現同事已返魂無術。

聞說呢位官員近期都無咩覺得唔妥，只係覺得好多嘢做，好攰，估唔到就咁過身。奉勸各位朋友平時要多保重身體，小心工作過勞觸發隱疾。