港大民意研究計劃總監鍾庭耀早幾日建議，為解決目前膠著局面，在政府提出政改方案後，舉行一次全民投票，如果投票有超過三分二巿民支持通過政改方案，希望泛民議員就現時立場重新考慮，但如果無立法會議員事先表明會按全民投票結果去投票，做全民投票的意義就不大，希望建制或泛民議員，都表態接受綑綁或表明參考民間投票結果咁話。
鍾教授諗得幾詳細，計算咗在技術上籌備民間投票，前後要2個多月時間，如果要在全港5個區做全民投票，需要50萬元，如果在10多個區做，相信要100萬元。
政壇高人就話，留意到一個現象，每每喺關鍵時刻，鍾教授就會提議用全民公投、網上投票的方法，而港大民意研究計劃好多項目都係自負盈虧，覺得鍾教授都好精明喎。
不過，今次泛民反應唔係太積極，泛民飯盒會召集人梁家傑就指佢哋會傾有關建議，但就話去年6.22全民投票，已有70萬市民表態，要求議員否決任何不符合國際標準的政改方案，人大8.31方案經多方考究，都不符合國際標準，因為有不合理限制，他認為未必要再做全民投票，才有足夠民意授權。
而律政司司長袁國強則強調基本法並無公投概念，需要探討法律上是否可行。他又說，個別泛民議員強調，無論市民是否支持政改方案，都會投反對票，質疑舉行全民投票是否有意義。
結論係無論政府或泛民，都對呢個建議無乜興趣。
Ariel
** 博客文章文責自負,不代表本公司立場 **
中大新聞及傳播學院公布咗一項民調，喺呢個月2號至9號訪問過千名市民，結果顯示只有4成被訪者認為立法會應該通過按人大常委決定下可能令不同政見人士成為候選人的政改方案，反對通過的有4成7，兩個數字都較去年12月的調查輕微上升。在中大呢個問法下，原來反對人仲多，半年前反對的人多達5成4，但最近兩期支持方案的人上升，反對減少，民意差幅已收窄。
大家都知道唔同民調，問法唔同結果亦會不同，中大的民調問得比較具體，所以一般反對通過政改的人數多過支持通過的，但呢個調查特別的地方，係問到如果當局願意公開承諾2017之後繼續改革特首的普選方案，支持通過的市民就由4成大升至5成8，否決的市民就由4成7減至3成4，顯示只要政府承諾2017年的改革唔係最後方案，仲有得改的話，支持的市民有近6成。
呢個調查結果相當有意思，同一啲溫和泛民提出所謂妥協方案有啲接近，就係話依家市民是否支持「袋住先」，主要的關鍵係呢個係唔係一個最後方案，如果唔係最後方案，應該支持先行出第一步。
政壇人士認為，純形勢分析，要阿爺支持政改方案可以有進一步發展，其實唔係好困難，而民意對呢個看法支持度又咁高，如果泛民要同阿爺傾妥協，呢個係比較關鍵的因素，可以得到市民高度支持。
不過，話得說回來，依家泛民多番將自己綑綁埋一齊，堅決否決政改方案，甚至發動辭職公投的民主黨何俊仁都係在投票之後先去辭職，顯示佢哋冇打算睇民意，所以民意係點對佢哋影響不大，佢哋似乎冇動力尋求同中央妥協，所以縱然妥協的方向好清楚，但成功機會仍然相當細。
