飯焦谷科技收到風?

特首施政報告快將出籠，傳媒猜謎遊戲開始，一則科技及通訊局可能翻生的消息，惹起CY搞科技的聯想。

 

CY上場時想改組政府搞「5司14局」，但去到立法會遇上激進泛民「拉布」而泡湯，《明報》報道行政會議成員羅范椒芬近日四出向立法會黨派摸底，睇睇佢地對重推科技局的意見。

 

人稱「飯焦」的羅范椒芬向來心口有個勇字，今次拍心口再去推科技局，頗有明知不可為而為之的唐吉訶德風範，據說無論建制派或溫和泛民主派，均認為重科技局會遇到激進泛民拉布，成事機會較低，向飯焦大潑冷水。

 

不過政壇八卦友就話，飯焦咁勇究竟是自己意思還是老細意思? 事關CY一直覺得香港唔可以只靠金融地產，想發展吓科技產業，會唔會在施政報告又玩科技概念?若然係咁，有個科技局當然方便去推政策啦。

 

不過政府弱勢，建制派撐政府又唔敢出死力，即使科技係經濟嘢，去番立法會都係凶多吉少，搞吓政策唔使過立法會就易好多啦。

巴士的團隊

Ariel

** 博客文章文責自負,不代表本公司立場 **

潮流興玩手機Apps(流動應用程式)，貴為民意代表的立法會又點會落後於人！立法會秘書長陳維安同傳媒聚會，就滿肚密圈，話準備推出Apps同埋youtube頻道，「低頭一族」最快下星期就會開到自己的YouTube專用頻道。

據講立法會做蘋果ios和Android的app亦做得七七八八。如果立法會下星期三通過，ios又攪掂的話，好快就可以成事。到時會分幾期推行，先攪會議串流、立法會日程表，跟住玩睇相，如果議員同意的話，仲會將議員通訊錄放埋上去。

咪以為立法會的網頁咁多字，無乜人睇，原來都有不少知音人，特別係網上的影片直播有回帶功能，直情係傳媒的好拍檔，可以隨時翻睇片段，咁就唔會睇漏眼啦！

唔講唔知，呢個回帶功能設立原意，係俾阿曾主席，可以好似球證咁，即時返睇之前片段，睇清楚有無人犯規。以前要回帶睇DVD，而家就上網攪掂，方便埋記者，都可謂德政。

其實，近期各政府部門都積極推出Apps，搶攻低頭族，好似天文台咁，日前就推出新的「我的天文台」Apps同埋「天氣廣播站」頻道，直接向公眾發送天氣節目，當然就唔係賣靚仔靚女報天氣，而係賣專業。唔知遲啲立法會又會唔會秘練兵，搵啲議員粉墨登場，搶吓收視呢。