無電視台投奧運轉播權 霍啟剛開聲叫政府促成「全民免費睇奧運！」

財爺波叔在預算案公布全民派1萬，市民對預算讚多彈少，波叔民望亦勁升16.8分至43.5分。在人人唱好之際，竟然有點雜音。

一向撐體育界的霍啟剛在facebook出帖，開頭仲客客氣氣話預算案中都有提及支援香港運動員，值得鼓舞。但話鋒一轉，佢就話東京奧運會即將舉行，轉播權卻遲遲未能落實，市民或將無法透過本地電視台觀賞香港運動員為東京奧運努力嘅成果。

霍啟剛出帖講奧運轉播權。

霍啟剛仲話其實既然有關心運動員嘅心，政府就更應該發揮帶頭作用，促成全民免費睇奧運！

見到留言區有黃金寶也講了幾句，話「希望疫情盡快過去，真希望社會多點正能量的訊息出現，體育運動是一種強大的正能量，而奧運會就正好為近年社會過多的負能量作舒緩，真心好希望有關當局可以爭取東京奧運的香港轉播權，相信今屆香港健兒一定會為大家帶來驚喜！奧運會是啟發人類價值觀的舞台，即使唔可以現場支持都希望可以透過轉播隔空為健兒加油。」

阿寶的留言。

雖然唔知霍啟剛想叫政府做什麼，但講到「全民免費睇奧運」，Sebatian真係舉腳贊成，過去好多屆奧運都由收費電視台投得，真係窮少少都無得睇。今屆仲有機會完全無得睇。

事關東京奧運將於今年7月開鑼，按正常去到奧運前半年，奧運電視轉播權早已落實，但如今卻好似無晒影。據講奧運電視轉播權代理公司代表去年11月曾來港與香港電視媒體傾入標，並開出天價，結果無電視台還價，如今再加上新冠疫情，真係無一家電視台有咁多銀彈去蝕。所以結局係隨時無奧運睇。

只能講句，Ken Fok，你努力去同政府爭取啦!

Sebastian

** 博客文章文責自負,不代表本公司立場 **

疫情烏雲未散，諸多不明因素影響之下，被視為香港希望的一班搞利技項目的初創企業真係好焦慮，朋友圈中呻到落花流水，搵生意艱難，最擔心都係唔知一班伙記點搞。逆境求存，迎難而上，本是創業者應有態度，之不過，遇上不可抗力之特大疫情，大家除咗互相勵勉，講聲加油，跟住又點算好呢？

創科局facebook 公布好消息。

今日傳來好消息，因為政府創科局出招，向立法會財委會建議，為科學園、工業邨同 Cyberport 數碼港嘅初創企業及租戶免租6個月，4月1日起生效！據資料顥示，政府是次寬減措施，涉總額3.8億元，預計惠及1800家初創企業。

初創朋友圈傳來減租好消息，大家Share啦。

據政府向財委會提交文件，租金寬免建議將涵蓋所有香港科學園、創新中心、工業邨及數碼港的初創企業、培育公司、共用工作間用戶、辦公室租戶、夥伴企業、提供專業服務的公司及商戶，面積以10,000平方呎為上限，預計惠及約1,800個租戶。

科學園及數碼港租戶受惠。資料圖片

講開又講，創科界真係流年不利，去年9月，中美貿易戰升溫，投資氣氛好差，科學園同數碼港曾經出手減租五成，為期半年。想不到中美關係稍為緩和，全世界諗住可以重新拼搏之際，來一場更大的挑戰，真係好難頂。搞初創最大負擔係人手同租金，須知道，創新靠人才，一個不能少，否則功虧一簣，今次政府出手減租減足半年，初創企業主省下之租金，可以幫補人工開支，留下人才繼續奮鬥。

寄望今次疫情過後，大家有過經驗，認識科技創新可以幫到手，咁就會帶來好多商機啦。正所謂危中有機，大家趁住呢場及時雨，重新部署，明天會更好。