財爺波叔在預算案公布全民派1萬，市民對預算讚多彈少，波叔民望亦勁升16.8分至43.5分。在人人唱好之際，竟然有點雜音。
一向撐體育界的霍啟剛在facebook出帖，開頭仲客客氣氣話預算案中都有提及支援香港運動員，值得鼓舞。但話鋒一轉，佢就話東京奧運會即將舉行，轉播權卻遲遲未能落實，市民或將無法透過本地電視台觀賞香港運動員為東京奧運努力嘅成果。
霍啟剛出帖講奧運轉播權。
霍啟剛仲話其實既然有關心運動員嘅心，政府就更應該發揮帶頭作用，促成全民免費睇奧運！
見到留言區有黃金寶也講了幾句，話「希望疫情盡快過去，真希望社會多點正能量的訊息出現，體育運動是一種強大的正能量，而奧運會就正好為近年社會過多的負能量作舒緩，真心好希望有關當局可以爭取東京奧運的香港轉播權，相信今屆香港健兒一定會為大家帶來驚喜！奧運會是啟發人類價值觀的舞台，即使唔可以現場支持都希望可以透過轉播隔空為健兒加油。」
阿寶的留言。
雖然唔知霍啟剛想叫政府做什麼，但講到「全民免費睇奧運」，Sebatian真係舉腳贊成，過去好多屆奧運都由收費電視台投得，真係窮少少都無得睇。今屆仲有機會完全無得睇。
事關東京奧運將於今年7月開鑼，按正常去到奧運前半年，奧運電視轉播權早已落實，但如今卻好似無晒影。據講奧運電視轉播權代理公司代表去年11月曾來港與香港電視媒體傾入標，並開出天價，結果無電視台還價，如今再加上新冠疫情，真係無一家電視台有咁多銀彈去蝕。所以結局係隨時無奧運睇。
只能講句，Ken Fok，你努力去同政府爭取啦!
Sebastian
** 博客文章文責自負,不代表本公司立場 **
旅發局進一步擴大旅遊義工計劃，準備招募更多對旅遊業有熱情的市民尤其是年輕人，希望佢哋身體力行做好東道主的角色，同旅客分享各種旅遊主題和知識。
Sebastian去聽了這些義工分享的經驗，發覺原來喺旅發局做義工真係唔係「義工」兩個字咁簡單，佢哋的經歷有趣的一面，也有感人之處。
「旅遊義工」Agnes退休前任職跨國公司管理層。
退休前在一家跨國公司做管理層的Agnes，擔任旅遊義工計劃已經有12年的時間，有什麼令佢印象深刻的經歷呢？Agnes分享話，在2018年的時候，遇到一位英國來的老人家，帶住一家大細同一本相簿，想搵返相片中的景色拍照留念。原來呢一位英國老人家係喺香港出生，5歲時跟隨父母返回英國居住。根據呢位老人家的自白，他對香港的記憶全部來自父母影低嘅相。
收到呢個請求之後，Agnes就一心想幫佢完成這個心願，認真幫老人家研究攝影地點喺邊度。結果就發現，除了一個景點外，其餘全部都對得上，Agnes就教老人家如何去現場影返啲相。佢哋影相時甚至擺出了當年老人家父母的甫士。
因為參加義工計劃不是日日返工，每次服務時長僅需大約3個鐘，Agnes隔幾日才會去到尖沙咀旅遊咨詢中心當值。事件過去後，有天返時時，有旅發局同事搵到Agnes，話英國老人家來告別，留底紀念品俾佢。Agnes打開禮物一睇非常感動，原來係老人家的父母當年喺香港影的舊照片。Agnes覺得呢啲係老人家的獨家回憶，不敢收藏，因為承載咗佢對父母的緬懷。後來先知，原來老人家已將舊相數碼化，送俾Agnes嘅係拷貝，現在存放在旅發局。
Agnes話，每當想起這段回憶，自己能夠幫老人家完成心願，好有滿足感。
退休之前喺跨國企業做管理層的Agnes仲笑言話，做義工工作仲有一個好處，就係佢平時返工工作壓力非常之大，做義工反而係佢緊張的工作生涯找到放鬆自己的一種好方法。
由新加坡回流香港發展的Marco，透過參與「旅遊義工」計劃重新認識香港。
Marco做咗6年的義工，佢係土生土長的香港人，但之前去了新加坡定居工作，但仍然覺為香港「做番啲嘢」，於是加入到義工招募計劃，現在從新加坡回流回香港，更希望通過計劃喺香港服務遊客，將香港的旅遊咨詢同旅客分享。
由於曾在新加坡生活，熟番當地人的生活習慣和語這，在做旅遊義工時，可以運用經驗協助遊客，例如，了解新加坡沒有鵝，只有鴨供應，所以明白新加坡遊客到香港品嘗和購買燒鵝是熱門活動，他就一早了解定向遊客介紹。
做旅遊義工，除了要求兩文三語流利，如果識多一種語言，對工作就更有幫助。Marco就笑言，除了三語，他仲識講新加坡式的英文，咁接待新加坡遊客時，佢就有個人優勢，黎到香港玩的新加坡人亦會覺得有親切感。
最新一期的旅遊義工計劃已開始招募，一直去到5月31日截至。今年成功入圍咗呢個計劃的學員，除咗可以學習多項本地旅遊方面的知識，譬如傳統本地文化、購物、綠色旅遊等等，今年仲邀請到星級導師，教大家點樣做好旅遊使者。
各位如果有興趣都可以試下報名參加計劃，為香港旅遊出一分力，亦都係結識世界唔同地區朋友嘅好好機會。
