港台節目《城市論壇》35周年，前廣播處長張敏儀接受《蘋果日報》訪問時話35年前，她時任港台電視部，眼見香港經濟起飛，社會漸趨成熟，建議定期在維園舉行《城市論壇》，讓市民發表意見。
張敏儀提到，當時的警務處處長極力反對，「話涉及非法集會，一定會暴動」。
有港台前高層話，張大姐講咗其一無講其二。城市論壇在1980年開壇，觸發因是港督麥理浩在1979年3月訪華，見咗鄧小平，去探中國對1997年俾英國繼續管治香港的可能。點知鄧公直接講，話中國會在1997年收回香港。
麥理浩聽到面都青埋，話咁樣投資者會好驚，老鄧拋咗一句，叫麥理浩向香港工商界傳話：「請香港投資者放心」。麥理浩回港，傳咗「請投資者放心，」呢句話，但就呑咗中國會收回香港主權呢個重點落肚，跟手密密做嘢。
香港在80年馬上搞選舉，先搞地方行政，選區議員。同時就搞新聞自由，港台就開始搞城市論壇囉。
港台老鬼話，當時督爺想香港學英國有個海德公園，講乜都得。港台就抄呢個模式，將維園變海德公園，搞出城市論壇。
結論係英國管治香港百幾年，都無俾香港言論自由，港台在1979年前只是政府喉舌，寫完稿要俾官員審稿。但一知道香港將來要交番俾中國，就馬上放言論自由俾香港，英國人政治手段真係高架。
Ariel
** 博客文章文責自負,不代表本公司立場 **
匯友昨日敲晒鑼開記者會，講咗近一粒鐘，普通市民話唔係太知重點。
簡單來說匯友證實咗之前同亞視大股東簽定股權交易合同的過程，到咗四月一日亞視不獲續牌，因為合同條件之一係要續到牌，所以呢個交易已不可能完成；第二係匯友好有心搞亞視，希望行會回心轉意；第三問政府點處理亞視的頻譜牌，主要合伙人胡景邵話公司正研究可用另一方式完成交易，問：「無牌有頻譜可唔可播？」
胡景邵今早在電台節目講得再白啲，話公司研究緊亞視的電視廣播牌照與頻譜牌照獨立運作的可行性，會諮詢專業人士意見，但如果通訊局同時收回亞視的廣播牌及頻譜牌就難實行，如果可以攞到頻譜，會搞電視「O2O」模式，加強與互聯網的聯繫。
依家兩間免費電視台無綫同亞視，其實每間電視台都有兩個牌，一個係廣播條例下的免費電視牌，另一個係電訊條例下的擁有頻譜的傳送牌。亞視的電視牌在今年11月屆滿，而頻譜牌就在2018年先屆滿，行政會議早前已決定釘亞視牌，根據法例，亞視一年後電視牌就無效啦。匯友依家係問政府亞視無咗個電視牌，佢個頻譜牌係咪可以繼續用呢？
知情人士提醒Ariel注意，在釘牌記者會上，通訊事務管理局主席何沛謙講得好清楚，亞視的固定傳送者牌照和頻譜原本到2018年11月才到期，通訊局根據《電訊條例》賦予的權力，在亞視明年4月1日廣播期屆滿時，提前撤銷亞視的頻譜。至於收回亞視頻譜後，通訊局會盡快決定日後的頻譜分配。
通訊局都已經按照法例賦予的權力，撤銷咗亞視的頻譜，明年四月一日同廣播片一齊拜拜，滙友想政府改決定，唔係易事呀。
