金多寶說故事 《第九回》
寄身紅塵生罪孽 唯有袈裟贖其身
「嘩！好大紮花喎！」大家未講野，老友甲又講：「睇佢咁斯文，不過都係小心啲，唔知佢乾唔乾淨，哈哈哈哈哈」佢賤笑完，話我知，原來佢假日响一間兜痞壽司鋪秘撈，樓上有一間大學生為主嘅雞竇，好多國內女大學生，為左買一個名牌袋，屋企又冇咁多錢寄比佢，就會去做一排，夠錢買野就走，所以不停有新血。
「有隻雞好鐘意叫牛油果壽司，頂佢，每次要我特登切粒牛油果整比佢，麻乜煩...」叫雞啲佬咁肉酸，咁核突！點同佢地搞得落呀？「你就肉酸！叫雞啲男仔真係好好好斯文，成個黎明咁靚仔。」靚仔都要叫雞？洗唔洗呀？「有啲人就係有心癮，鐘意刺激。」
個人喜好，可以影響幾多人呢？
係自私？定控制唔到？費事抽羅志祥水。
有朋友認識一位公眾人物，外貌出眾，我亦親眼見過佢。身上嘅皮膚、氣質，真係天生明星格；散發出嘅光芒，係响報紙上面睇唔得出。原來有啲野，用對眼真係睇唔出。幾年後，我再見到佢，已經係响生果日報，當然係衰野啦。
我唔能夠太直接寫事主「侵害」或「傷害」他人，亦唔想公告事主太多私隱，因為案件未審訊完畢，事主可能清白，唔能夠影響其聲譽。不過，據報紙所講，都係同羅志祥一樣，因過往涉及貪戀女色，搞到一獲泡。費事有戇dog 仔女走去查事主身份，其八字部份顯示如下：
吉 丙 吉 吉
子 午 卯 酉
因為有好多野，不便公開，要等結案，再深入睇佢八字，得果幾粒字出得街判黎做乜。我連佢出事嘅大運都唔想貼出，今日純粹膠吹一下。
一見丙火，坐下四桃花全齊，令我睇完羅志祥單野，第一秒就諗起佢。兩人個殼都好得，啲女唔洗約都識飛埋黎。當年我第一次見事主果陣，同塲已經有三條女互睥，花生味濃。
最有趣嘅地方，事主都係同母親形影不離。實情事主身弱，喜印，但咁有女人緣只會令佢駕馭不住，沈迷生事。聽朋友講，約干年前，事主為事業所困，求見一位高人，高人能知過去未來，曾痛斥事主，並勸告事主若要今生平安無事，必須盡快出家，看破紅塵。至於高人同事主嘅相會，唔係我朋友齋講。打後事主從事好多公益慈善活動，絕大部份都係公開。
真係要出家先搞得掂，咁今次佢咪大獲鳥？就案情已經唔看好，但願，如有做錯嘅可以改、受害嘅可以釋懷。命中子午卯酉全部齊嘅朋友係咪都色中之徙？有異性緣，唔多唔少外表都有魅力吧，論把持能力，還得睇自己。我認識一啲正直嘅朋友，命中坐下都有三桃花，社會地位亦唔錯，有緣會講下。等等......
傳說中乾隆八字：
丙庚丁辛
子午酉卯
都坐下四桃花，不過人地係皇帝，玩乜都得。
香港兔蘆術數學會
** 博客文章文責自負,不代表本公司立場 **
