一眾泛民團體一齊搞反政改方案的遊行集會,昨日一齊開記者會, 但同枱食飯,各自修行, 民主黨主席劉慧卿仲同學民思潮女將黃子悅公然駁火。
成件事的起因是學民思潮事先出了個聲明,題為「堅拒密室談判-- -不要重演2010年的轉軚歷史」,指「回望2010年的政改爭 議,本來挾著五區公投以及『余曾辯』之勢, 否決政改已成主流民意。而在政政表決前三週….終極普選聯盟亦與中聯辦進行密室會談,結果在泛民陣營一片爭議聲不斷之際, 甚或泛民要求延遲表決也不得要領的情況下, 民主黨與民協八名立法會議員依然故我,閉目塞聽地『轉軚』, 對政改投下贊成票,促成違反民意的政改獲得通過。」
學民思潮仲在facebook專頁上放埋民主黨當年同中聯辦官員 的合照,見到卿姐、何俊仁、 張文光同當時中聯辦副主任李剛一齊影相。
到昨日大家坐埋枱開記者會時,「拾念」代表葉錦龍發言, 提議泛民大團結,要目標對準政權,而唔係打擊同路人。 但到在佔中時絕食出咗佔的黃子悅講嘢,就開始發炮, 話近日有傳言泛民議員同中央會面, 學民樂見而家有泛民議員在場表明佢哋否決政改的決心,「 希望各位議員唔好重複之前2010年所犯下嘅錯。」
在場只有民主黨卿姐和工黨主席李卓人兩個議員, 黃子怡指邊個大家都明。卿姐當然唔使同你客氣,隨後就還拖, 話剛才有代表話唔好互相攻擊,但今日已經有人喺網上攻擊民主黨, 亦都話2010年係犯錯,卿姐話2010年民主黨支持一人兩票政改方案,讓政改向前行一步,她不會接受呢個係錯:「 如果大家坐埋呢張枱,係咁搞,亦放晒上網指摘民主黨, 我話畀大家聽,我哋係唔會接受!」
卿姐媽完,黃子悅無再回應,駁火就咁完了。
Ariel
** 博客文章文責自負,不代表本公司立場 **