牛奶種金

講起騙案，真是層出不窮。細有細呃，大有大呃。十多年前的一單「牛奶種金」騙案，便令我印象十分深刻。

當時有位朋友打電話給我，他很興高彩烈地告訴我近期賺了很多錢。他說有個老外搞了一盤生意，用牛奶種金。我聽後滿腹狐疑，牛奶種金？什麼咚咚？

朋友解釋，其實係利用牛奶種出某種特別的菌，那種菌很好賣，可以賣到很好價錢。他說投資了10萬元，用不到半年，已經變成30幾萬。

朋友繼續講，他不單止種金賺錢，還當了「組頭」，賺得更多。我問他什麼是「組頭」。他說，就像小組組長，當招攬到其他人投資，成為他的下線，在下線的投資額中，他可以分到某個比例，假若他的下線再成為「組頭」，其下下線的投資額，他亦可以分到錢。換言之，下線的人或者下下線愈多，分錢更多。

他說成為「組頭」之後，投資回報更快，賺得好開心云云。提到「組頭」，我已經知道這種運作模式，其實是層壓式推銷。賺錢不是透過買賣什麼商品，而是靠拉人入會，第一層拉了第二層的人入會，可以分錢，第二層拉了第三層的人入會，第一層的人也可以分到錢，多一層便多一份錢，令到參與者很有積極性去拉人入會，成為「組頭」，可以坐著收錢。

我問朋友，所謂的牛奶種菌，種出來的是什麼菌，又會賣到那裡？他一概不知，但說在公司的介紹會上，那老外講得好詳細，但他沒心機聽而已。我當時的反應係，一個老外就呃到人，呃人其實很容易。

事隔半年，某雜誌用牛奶種金做了封面故事。事件曝光，馬上惹起警方的調查，那老外好快已經腳底抹油，走人大吉。朋友的投資當然泡湯，本金亦追唔番。發達？一場白日夢而已。

以我當差多年的經驗，呃人其實不外乎兩大板斧，一個是針對人的同情心，另一個是針對人的貪欲，特別是後者，無論是貪財也好，貪色也好，都很容易會露出重大弱點，給人乘虛而入。人家跌些少錢，你湧埋去執，結果連自己的銀包都無埋，血本無歸。

黃毅力

** 博客文章文責自負,不代表本公司立場 **

上期講到有電話騙案，今日都想講吓一個阿婆騙案。

話說早幾個星期，有個多年無見嘅朋友， 叫我去銅鑼灣時代廣場對面的後街，坐係街邊食飯。呢個情景， 令我聯想起後生時在廟街坐在街邊食飯嘅情況，都係好有風味。 叫幾味餸，一枝啤酒，講起二十年前的舊事，令我地情緒高漲， 開心異常。

食食吓的時候，有個滿頭白髮的阿婆行埋嚟，佢有少少駝背， 年紀都有70幾80，細細粒，有點弱不禁風。阿婆同我講， 佢幾日冇食飯，好肚餓，叫我比啲錢佢去買飯，講完好似想喊。 但我用我做過差人直覺，覺得呢個阿婆眼神有啲閃爍， 講嘢時眼無望實人，個樣有點不老實， 但佢予人的整體感覺好似好可憐，我即時有少少不知點應對。

說時遲那時快，身邊朋友就話，「阿婆啊，你咁肚餓不如坐低先啦， 我叫碗白粥俾你食，你唔飽可以食夠兩碗，總之食飽為止。」 阿婆聽到佢咁講，面色一沉，竟然突然爆左句，「我X你老母呀。」 說完轉身，揚長而去。

我真係大開眼界，都幾佩服朋友反應咁快，諗出呢個辦法， 去試個阿婆，一試試出佢想搵笨。但我又諗唔到阿婆咁粗口， 竟然問候我朋友娘親。呢個故事教訓我哋，同情心係唔可以濫用嘅。