自稱公民黨黨員，化名「古仔」寫到第八篇。
公民黨，究竟做緊乜？（八）
好快又有新篇，要咁快手，一則係時近立法會投票，好多嘢變得好敏感，其中有啲「居然」同我地黨扯上關係，真係要講下；二則係「白色恐怖」變本加厲，一日緊過一日。
先講「白色恐怖」。Audrey同傑哥已經採取咗幾條「安全」措施：
第1.聘請咗專業電訊人士，對黨部內外進行徹底安全檢查，設法要查出洩漏消息嘅源頭同缺口；
第2.揾咗我地九龍西支部嘅陳淦濱，負責內部網絡安全設置嘅加強，提高級數；
第3.重申執委各人唔好喺網路同電話上討論「黨內機密」（我其實唔知道邊啲算係黨內機密），只可以當面傾談。仲有 -
第4，好得意，Audrey同傑哥「虛心接受」《究竟做緊乜》講起俾人話「專橫霸道」嘅批評，特別互相提醒自己要改變下對黨友嘅態度，溫和啲，「親民」啲，多啲同人拍下膊頭，有啲笑容；就算係湯渣，雖然無必要拉攏，但亦都唔好打擊。怕且認為少啲俾人鬧，就會少啲洩密咁。
唔知係唔係睇得懸疑小說多，忽然覺得自己有點兒好似啲連環殺手，殺咗人之後好鍾意返番現場，睇下啲警察點樣騰來騰去一頭煙。起碼覺得點解一味搞網絡電話安全。我都講過，所有喺呢度講嘅嘢，都唔關電話網絡事嘅。
講番好多事情變得好敏感。昨天晚飯，周圍好多人以及電視新聞，都講緊警察喺西貢拉咗9男女，仲搜出好多炸藥同武器，仲現場要引爆添。我身邊人（對唔住，唔講得係男定女）細細聲同我講：「唔係你地黨丫嗎 ？」我笑住講：人地都話明係本土派，關我地咩事？ 身邊人話：你地啲banner 夠話「捍衛本土」囉。嗱，咪掂呢啲嘢，死得人兼坐監架，癲咗咩！我話：點會？我地啲大狀，點會搞… 講講下我都停咗口，唔記得夾餸扒飯…
因為忽然想起另一條新聞：話金鐘添美道有公民黨同人民力量，在倉庫積聚大量「架生」，仲派人24小時輪流看更。近日警察喺立法會門口「清理雜物」都無去到嗰度。上次佔中時候，我地黨曾健超俾六條差佬拳打腳踢，都係因為淋人地屎尿引起嘅…
諗諗下，心頭一震，莫非我地黨真係都要走暴力路線？傑哥同Audrey佢地連政改方案都唔使同我地傾，參加什麼行動更加唔會知會我地啦！記得黃毓民喺立法會媽叉林鄭嘅時候，就講過話要掟佢汽油彈，睇黎都唔係得個講字。我從來唔贊成我地黨同佢行得咁埋，我喺前面都講過，當年搞「五區公投」，Audrey走去同社民連一齊，簡直係「美女與野獸」，唔通今回要一齊掟汽油彈？
仲有第二件敏感事，就係關於民調嘅。傑哥同Audrey睇泛民捆綁睇得好緊，上星期就講定，飯盒會要求各人，輪住發言，總之要挨到18號；此外，在執委會上提出要order鍾庭耀佢地整出個「靚啲嘅」滾動民調數據，俾大家可以借勢。 我個人唔反對做呢啲手腳，數據就係用來玩架嗎！所以上星期三間大學滾動民調出咗個「反對多過支持」嘅黃金交叉後，我好明白係乜嘢事，但亦都好唔明白嘅係，點解只有一日咁多，一路都係「反對多過支持」，一路拖到今日咪仲好？
講真雖然我心中唔明，點解唔可以支持「袋住先」，不過事到如今，馬死落地行，有得我地揀咩，身為公民黨人都要面，唔想衰架。有啲網友話我點解唔走人，我又自問走去邊，民主黨？社民連？人民力量？唔啱民建聯呀？好似等巴士等咗半個鐘頭都等唔到，你係走去打的，抑或繼續等？可能你地會好瀟灑走一回，我就始終唔係好憤氣：咁就行開，我個人咪好失敗？
http://m.discuss.com.hk/index.php?action=thread&tid=24697907&extra=page%253D3&page=40
Mark Felt
** 博客文章文責自負,不代表本公司立場 **
自稱公民黨黨員，化名「古仔」繼續爆料，在網上流傳。
公民黨，究竟做緊乜？ （七）
政改政改，講咗成兩年咁耐， 我地黨內居然沒有真正討論過政改方案內容，你信唔信？基本上就係上層搞掂曬，而且仲要係領袖日日喺傳媒不停地講。幾十個小時後，立法會都投票表決了，我們仲有乜嘢好講 ？
從政改方案到佔領中環，見親都係傑哥出面，咁多嘢講，入晒公民黨數，其實又有幾多次真係返嚟打招呼商量過？黨內係咁，喺外邊同泛民一齊，何嘗唔係咁 ？
喺佔中時候，大家仲記唔記得有一次所謂嘅廣場投票，決定是否要退場抑或堅守等警方清場。其實當時運動已經係處於一個比較尷尬嘅境地，公民黨又好，民主黨又好，都想撇低個佔中，等學生去主持，包括陳日君，馬丁李等，都明知道政府今次原來玩「拉布」，想靠市民越來越不滿，來陰乾佔中運動，大家自然希望快 退出呢個進退不得嘅困境；當時我聽到，應該我地泛民係講緊，儘快返番去立法會，搞「不合作運動」，公開講就話係同學生「裡外合應」，實際上係想甩身；當然，所謂「劃清界線」都係一廂情願，最終清場時候又咪一樣要故意走入去坐低幾個鐘頭，俾傳媒影咗相，然後搏拉被警方逐個帶走，叫做向佔中交咗差 ？
對唔住，講緊係廣場投票，越講越遠添。 話說結果學生連廣場投票都搞唔掂，一鑊粥，非常難睇。 當時係「雙學」即係學聯同學民思潮出面解畫兼道歉，點知電視映出嚟，赫然一行人排排企，除咗周永康黃之鋒等，居然仲有「佔中三子」，仲有梁家傑 ！ 排排企係為咗鞠躬道歉，為廣場投票流產道歉！ 喂！關我地公民黨乜X事呀！邊個叫你上去㗎 ！唔單只我地，民主黨黃碧雲、民協馮檢基等都愕晒然，衝口而出就鬧：你梁家傑作為泛民代表，完全冇徵詢大家意見咁就禽禽青去道歉，豈不是將「廣場投票」入晒泛民數，無啦啦要我地為投票流產負責？！ 出風頭都要睇時勢，係又上唔係又上，你估總之樣樣都有你份，連醜怪道歉都「唔執輸」，送殯都爭頭位，咁就叫做著數，cheap 啲掛！
不過你唔好話，確實有人問點解唔見劉慧卿何俊仁上臺鞠躬 ？傑哥上臺仲可能係心中暗喜，事關傑哥同Audrey「核心價值」就係「隊散」民主黨，如意算盤就係：如果民主黨在政改問題轉呔支持，正！民主黨一定內部分裂散晒，公民黨可以收編民主黨啲地區地盤，隨即超越民主黨成為真正泛民大佬，與此同時，政改方案通過咗，我地又可以旁若無人地代表泛民去參選，號令全港反對派數以百萬計擁躉。（不過到時候傑哥同Audrey要爭餐懵）
如果民主黨係政改投票都唔轉呔，咁公民黨更無理由做衰仔， 故此，總之企硬反對「831決議」，就係上策。
最近，就喺上個月，有個民主黨區議員叫做麥潤培， 係新界沙田區利安選區現任區議員，想「跳槽」向我地新界東支部「投誠加盟」，請公民黨支持佢參加2015年區選。 我地高層好緊張重視，認為接受其入黨和支持其參選，肯定有著數，一方面公民黨多一個現成區議員，有乜壞處？另一方面變成一場攻心戰， 向民主黨發出「撬牆腳」嘅音波功，影響其軍心。
區議員係咁，何俊仁「辭職公投」就更唔使講啦， 今年1月份第373次執委會議，會上大家大彈何俊仁單方面宣佈「辭職公投」，認為佢根本無料到，「辭職公投」純屬「個人作秀」，公民黨可以不理，亦唔會有人力、財力支持。 梁家傑話：你(何俊仁)係「飯盒會」上聲都唔聲，突然發佈消息搞到措手不及，點都無得傾。
當我地大家為政改方案十五十六時候，我地黨啲高層，極可能係躊躇滿志，滿肚密圈，唉！大家原來腦筋唔一樣 ！
http://m.discuss.com.hk/index.php?action=thread&tid=24697907&extra=page%253D1&page=38
