新一期「《巴士的報》送大禮」問各位讀者細個鍾意玩啲咩，留言獲得最多讚嘅15位讀者將會收到「迷你兵團的嗒糖」。今次反應非常熱烈，睇吓邊幾位讀者得獎，又睇睇你細個有無玩過呢啲嘢啦！
HaHa HaHa：80後嘅童年回憶！不能不想起風靡一時「奇多圈」。
點擊看圖輯
網上圖片
網上圖片
網上圖片
網上圖片
網上圖片
網上圖片
網上圖片
網上圖片
網上圖片
網上圖片
編按：上世紀90年代「奇多圈」真係風靡一時。小朋友買包「奇多粟米條」，拆開包裝就可以得到一個「奇多圈」。圈上刻有各國景點同地標，設計好有心思！玩「奇多圈」方式好簡單，讀者黃絲斯教路：「用手指壓住個邊，射出去，個圈蓋住對方嗰個就羸，可以攞咗人哋果個。」
編按：小編嗰時都有玩，經常輸；有次輸咗個「巴黎鐵塔」俾人，喊咗出嚟。
網上圖片
Elaine Cheung：細個邊有錢買玩具，咪同格離屋啲小朋友玩橡筋繩，同用膠袋捉烏蠅。
編按：那些年嘅小朋友真係創意爆登，乜都可以變成玩具，無聊拎條橡筋都可以玩一餐；無嘢玩就落樓下同其他小朋友玩「何濟公」，鬼殺咁嘈，鬼咁開心。如今小朋友玩意就比較單調，有iPad或智能手機已經萬事足。小編建議各位家長多同小朋友到戶外活動啊。
Siu Ting Yip：以前細細個返學最鐘意摺「東南西北」同格離位d同學仔玩。
Freddy Wong：東南西北，帶返學校玩都唔怕。一班同學仔玩，仲可以拉近同女同學的距離。
編按：「東南西北」真係夠晒無聊但又非常好玩，最搞笑係同學仔一定會作埋晒啲騎呢指令。套上手，選好「方位」同「步數」，最後就會得出一個搞笑結果。誠如Freddy Wong所講，小學雞年代，男女同學玩「東南西北」真係會大大拉近彼此距離。
網上圖片
陳琪康：紙摺嘅鬼爪，摺夠十隻可以戴兩隻手或者整個好型嘅圈。
編按：摺十隻是唔夠的，有人會摺多幾隻變成加長版鬼爪，然後無厘頭就會同啲同學仔展開「狼人」大戰。
網上圖片
WingYi Ng：換衫紙公仔，有時仲會自己畫衫剪出黎比佢着。
編按：那些年未有大頭「B女」，想買Barbie又好貴，換衫紙公仔就應運而生。那些年放學後齊齊畫公仔衫的小朋友，有幾多今時今日成為時裝設計師或潮流達人呢？揮個手啦！
網上圖片
San NaNa：我最鐘意嘅童年玩具係四驅車。雖然我係女仔，但當年都好迷睇四驅兄弟！嗰陣擁有第一架四驅車真係好開心，屋企附近嘅屋村空地仲整左條免費大跑道，嗰陣日日都可以睇住自己部心愛既四驅車喺跑道上面風馳電掣，真係好刺激好有快感。嗰陣因為有四驅車先令我可以無憂無慮開開心心就過咗大半日，兒時嘅快樂真係可以好簡單！所以四驅車真係我兒時美好既童年玩具，而家諗起都好想再玩，好想再回味一下當年美好嘅時光。
編按：不少人首次砌模型就係砌四驅車。當年幾乎人人都有至少一架「戰車」，仲會加埋「龍頭」、「鳳尾」，整到非常型棍去參加比賽。當年生產商推出咗好多唔同摩打，「紅摩」、「黑摩」，花樣繁多；但係最勁嗰個，必定係內地山寨廠出品，快到架車轉彎時飛出賽道。
網上圖片
Issac Lam：搖搖，一大班人一齊玩，仲可以研究花式。
編按：搖搖真係估佢唔到咁好玩，一條繩綁住一嚿嘢，居然可以做出超多花式。小編都有玩過，最叻花式係「勁力旋風」，最戇居係做「衝上雲霄」時接唔住個搖搖，撞爆額頭。
網上圖片
MinGju Gracie：膠筆盒！開晒佢擺晒筆當機關槍大炮機械人彈擦膠咁同同學仔對戰。
編按：或者我重申一次，那些年啲小朋友真係乜都可以玩一餐，創意爆登。除咗筆盒變戰車外，大家又有無試過間尺加支筆變成「飛機」呀？
HY Wong：天下太平，有時候上堂撞正老師唔喺度，有代課老師嚟話可以做自己野，咁就同隔離同學玩天下太平。有時仲唔止兩個人玩，同d同學前後都一齊玩。
編按：天下太平只係用紙同筆就可以玩到好精彩。「參戰」各方通常都會畫到無限咁多個保護網，或者係無厘頭畫埋晒啲超強勁武器，最終玩到落堂都未玩完。
Hiu Lam Yip：懷舊玩具，經典重現！講童年玩具梗係紅白機啦。機內可以放置不同遊戲碟，百玩不厭，更可以與家人、朋友一同重拾童年回憶，樂趣無窮！相信大家亦會好鐘意玩遊戲機。
編按：紅白機正式名稱係「FC遊戲機」，1983年推出即受到廣大玩家歡迎，到2003年先停產。遊戲畫面雖然比較單調，全部都係8bit公仔，起晒格咁，但係遊戲內容設計得相當有心思！其中最出名作品包括Mario、坦克大戰、炸彈人等。
網上圖片
Manman Chan：我哋細過係用線拖住呢種叫金鳳嘅甲蟲，等佢飛好似飛機咁，現在大個諗番起覺得很不對呢，小學時代真無知。
編按：原來嗰時有啲咁殘忍嘅遊戲，小編真係未玩過。問返啲前輩，佢地細個嗰時一街都係「金鳳」，新界地區就更多，如今唔知點解唔見晒。
網上圖片
Jason Li：兒時我們四姊弟一起玩飛行棋，成日玩也不厭！
編按：飛行棋最好玩就係「踩」到對手返起點，幸災樂禍最過癮。小學雞年代仲會玩康樂棋、鬥獸棋等，簡單又益智。
Wincy Chan：90後小朋友玩「鱷魚頭」次次都會驚死自己俾佢咬，見到D朋友俾佢咬就一定笑到面都紅曬。
編按：一班朋友輪流撳低隻「鱷魚」啲牙，不幸撳中機關的話，隻鱷魚就會「啪」一聲合埋口咬住隻手拍，緊張又刺激。
網上圖片
Amy Au：吹波膠，即係有支小型牙膏狀嘅膠加一支小吹管，望住吹出來的透明波波，充滿幻想，好懷念！
編按：用力一吹，牙膏狀嘅膠就會變成半透明粉紅色波波，實在可愛，可惜個波一定好快就漏氣！而家喺部分舊式士多仲有得賣，一個幾毫有交易。
網上圖片
