政事
政改方案投票決戰爆出小冷門，唔係議案通過咁意外，在建制派議員大部份離場下，只有8票支持。
建制派議員下午開記者會，解釋出事情況，話當時是想等抱恙的劉皇發返回會議廳一齊投票， 結果未等到又叫不停會議，才會集體步出會議廳，對於在表決過程中的失誤，建制派深感遺憾， 並向一直支持政改方案的廣大市民深感歉意。不過，留在議事廳上投票的自由黨、陳婉嫻等建制派議員並無出席記者會。
街外有疑問建制派為咗劉皇發一票，要冒咁大風險值唔值得呢？聽咗咁多建制派議員解畫，印象最深之一都算係新民黨的田二少答得比較有point，佢話當時泛民有四位議員未發言，唔知佢哋的態度， 萬一佢哋態度有變，咁發叔呢一票好重要，所以強調自己選擇離場唔係「蝦碌」。
好難評論田二少當時係唔係咁諗，但佢呢個解畫已經算做比較有意思， 講得出佢地咁大動作搞到咁亂究竟為乜。
Ariel
** 博客文章文責自負,不代表本公司立場 **
立法會對普選特首方案進行歷史性表決，事前雖然都預料不獲通過，但票數就出人意表，28票反對，8票贊成下，未獲立法會議三分二支持，議案不獲通過。
表決時意外地只有37名議員在座，建制派就解釋，因為經民聯的劉皇發發叔因病遲到，在投票即將進行時，他正在趕往立法會途中，佢哋想等埋一齊投贊成票，由同屬經民聯的林健鋒提出休會，但未獲主席曾鈺成同意，於是就想集體離場造成不夠法定人數的效果，有十五分鐘時間點算人數，令發叔可以趕得及到立法會投票。
當大部份建制派議員離開會議廳時，唔知係咪真係有溝通問題啦，自由黨5位議員，工聯會陳婉嫻、工業界代表林大輝以及保險界的陳健波，並無隨隊離開議事廳，結果就夠人數繼續開會，馬上進行投票，就出現咗出人意表的28票反對，只得8票支持的奇怪結果。
雖然就算係建制派加埋劉皇發到場全部投贊成票，議案都係未獲三分二的議員支持，政改方案都係唔會通過到。但而家呢個結果，都真係留下太多的想像空間了。
