「愛妻號」好老公。
周柏豪受訪港台節目《舊日的足跡》，自爆18歲那年因滿面爆瘡失去模特兒工作，擁有七級鋼琴造詣的他，當年也就加入著名音樂創作人陳光榮的錄音室當義務工程師。柏豪憶述：「第一個星期我遇上容祖兒嚟錄音，我幫佢斟水、抹咪、搬櫈，佢當然唔識我，我亦都冇自信，唔敢望佢，到依家我都唔敢話畀佢聽。我最開心見到鄭伊健哥哥，佢係我超級偶像，我會偷偷地望佢，偷聽佢唱歌，當時水機換水、洗廁所、叫外賣通通由我包辦，我好自豪我係『叫外賣專家』，七八個人，每日三餐，我全部叫啱，原來聽人講嘢，係要用個心去聽，先至唔會錯！」
周柏豪第一個低潮期，可以為鄭伊健、容祖兒斟茶遞水，也是美好回憶。
暗瘡期的柏豪遇上了他現今的太太朱小姐並展開追求，當年他為保護女友可以去到好盡：「我哋冇資格豪食、豪飲、豪住，初期好多時都係由佢（朱小姐）埋單，佢從來唔介意，所以如果歌迷唔接受我結婚，我唔會在乎冇咗份工，因為我好愛呢個女人！十年來我冇公開拖過佢隻手，我哋淨係買外賣返屋企食，因為（咁樣就）唔會驚，好安全。最驚嗰次都係2016年帶住隻求婚戒指去富士山向佢求婚，我偷咗佢隻戒指去度size，最驚過關嘅時候俾人查出，如果申報又怕俾佢發現，於是我話不如我哋兩個分開行（過關）。海關（關員）問我隻戒指係乜嘢？我話用嚟求婚，佢講咗啲嘢，我唔知道係乜，佢冇沒收，可能佢係祝福我！情人節嗰日求婚成功之後，天上竟然出現一道彩虹，我知道係上天對我嘅祝福。」
周柏豪現在有女萬事足。
周柏豪可以抱囡囡拍MV，又計劃明年與太太試婚紗作補償，生活愜意。
不經已流露浪漫天性的柏豪亦坦言，希望彌補對愛妻的遺憾：「如果人生可以返轉頭，我希望填補一個遺憾，就係因為我哋怕結婚消息通天，我冇喺佢試婚紗嘅時候陪住佢，為佢拉拉鏈，再聽佢問我『我靚唔靚？』，然後我再答佢『你係最靚』呢個環節……不過我哋已經結婚4年喇，出年第5年，我會做一件事，就係抱住囡囡陪太太再穿婚紗，同佢拉拉鏈，補返同佢講嗰句佢係最靚嘅！」
周柏豪。
柏豪形容疫情下與初生女兒相處時間多了，是千載難逢的緣份，他更笑言「重金禮聘」4個月大的囡囡在新作品《劫後餘生》MV中亮相：「哈！佢（囡囡）嘅報酬係兩粒餅仔，（囡囡出現）一兩個鏡頭無傷大雅，呢個亦係我同囡囡嘅一個記錄。MV係喺我家屋企拍攝，全屋都係人，佢好興奮冇瞓晏覺！依家我唔會應酬，完成外面嘅工作第一時間會返屋企湊女，我希望再多生兩個，先嚟一個仔，湊夠一個好字！當然我都會繼續努力工作，我嘅目標係將每一個範疇都做到最好，如果大家認為「天王」係（娛樂圈）最高級別，我希望自己能夠達到呢個級別！」
