賊喊捉賊

工會和工商界政黨連番格劍，最近焦點是強積金對沖問題，工會要取消現有的對沖，工商界反對取消，特首CY在競選政綱有提過要取消，傳聞佢本來想寫落今次的施政報告，最後在工商界反對聲中抽起。

工聯會立法會議員陳婉嫻昨日爆響口，話聽聞經民聯主席梁君彥，聲言不支持施政報告致謝動議，威脅政府不要在報告內提出取消強積金對沖。記者問番經民聯成員石禮謙，佢例牌唔認，話佢地永遠不會以任何交易作為手段，只會是其是、非其非，他又說會支持施政報告的致謝動議。 

不過亦有八卦友爆料，話嫻姐賊喊捉賊，事關工聯會同政府爭緊取消強積金對沖以及標準工時，更曾向政府聲言若不實施標準工時，佢地唔會支持輸入勞工咁話。

而家政府手上牌都唔多，仲要同勞工界及工商界左交換右交換，最後會換到乜呢?

Ariel

** 博客文章文責自負,不代表本公司立場 **

上月上任的新聞統籌專員馮煒光，沉寂咗一段時間，今日在「老闆」的一年一度重頭戲出現，主持特首記者會，首次以專員身份出現在公開場合，現場都有不少記者向佢遞卡片，當然都想爭取到發問機會。

 

結果就有人歡喜有人愁，有電視台一條問題都問唔到，但鳳凰衛視就包辦頭尾兩條問題，雖然一個係鳳凰香港台，一個係鳳鳳電台，兩個記者仲坐開咗，但都好明白現場未被點中問問題的行家好有意見，馮專員就解釋話唔知道同一個機構，睇嚟專員既要熟悉各傳媒機構的話事人，亦要多啲認識前線記者喔。

  

除咗認人，仲要識計時，話說記者會原訂45分鐘，但馮專員提前講咗最後兩條問題，結果特首答完後仲有五分鐘，在場有行家話未夠鐘，最後特首話可以答多兩條問題。嘩，做緊電視直播的主持可能嚇得一身汗，電視台通常要問節目部攞時間來做呢類特備節目，通常要攞到比較精準，例如14:30至15:15，如果記者會提早完，主播就要硬啃五分鐘，又冇現場畫面，齋吹五分鐘都幾考工夫，為咗大家好，希望專員下次時把握好啲囉。不過講番半句公道話，馮專員剛上場就要出大騷，緊張起來難免有少少蝦碌，希望佢好快可以代入角色啦。

講開時間啱啱好，立法會秘書處的youtube頻道就揀咗今日開通，以後想睇立法會議員表現又多一個渠道：

http://www.youtube.com/legcogovhk

仲有Flickr相簿，當然啲相正經咗啲：

http://www.flickr.com/photos/hk_legislature。

  

秘書處遲啲仲會有埋app手機應用程式，人人都玩新媒體。