上月上任的新聞統籌專員馮煒光，沉寂咗一段時間，今日在「老闆」的一年一度重頭戲出現，主持特首記者會，首次以專員身份出現在公開場合，現場都有不少記者向佢遞卡片，當然都想爭取到發問機會。
結果就有人歡喜有人愁，有電視台一條問題都問唔到，但鳳凰衛視就包辦頭尾兩條問題，雖然一個係鳳凰香港台，一個係鳳鳳電台，兩個記者仲坐開咗，但都好明白現場未被點中問問題的行家好有意見，馮專員就解釋話唔知道同一個機構，睇嚟專員既要熟悉各傳媒機構的話事人，亦要多啲認識前線記者喔。
除咗認人，仲要識計時，話說記者會原訂45分鐘，但馮專員提前講咗最後兩條問題，結果特首答完後仲有五分鐘，在場有行家話未夠鐘，最後特首話可以答多兩條問題。嘩，做緊電視直播的主持可能嚇得一身汗，電視台通常要問節目部攞時間來做呢類特備節目，通常要攞到比較精準，例如14:30至15:15，如果記者會提早完，主播就要硬啃五分鐘，又冇現場畫面，齋吹五分鐘都幾考工夫，為咗大家好，希望專員下次時把握好啲囉。不過講番半句公道話，馮專員剛上場就要出大騷，緊張起來難免有少少蝦碌，希望佢好快可以代入角色啦。
講開時間啱啱好，立法會秘書處的youtube頻道就揀咗今日開通，以後想睇立法會議員表現又多一個渠道：
http://www.youtube.com/legcogovhk
仲有Flickr相簿，當然啲相正經咗啲：
http://www.flickr.com/photos/hk_legislature。
秘書處遲啲仲會有埋app手機應用程式，人人都玩新媒體。
Ariel
** 博客文章文責自負,不代表本公司立場 **
梁特首在施政報告話要搞番科技局，正如巴士的團隊早前所講，見到行政會議成員羅范椒芬身郁郁問立法會議員對設立科技局的意見，就知政府有意舊事重提，玩番呢味啦。
想當日梁政府正式上任前，提出成個改組方案上立法會申請撥款，當中包括成立科技局，但最後改組方案被拉布攻勢殺掉。今次政府縮龍成寸，唔搞咁多，只提一個爭議較少的科技局，但據稱范椒向立法會議員探路時，不少議員話自己支持，但估計激進反對派又來拉布，設立科技局好難過關。
聞說政府都計過條數，預咗有人拉布，但如今拉布和前年頗有不同，當時新政府趕住上任，政府改組方案一日未過，好多新人難就位，成個政府都癱咗一半，所以對拉布容忍能力有限，而且立法會曾主席不同意太快剪布，溫和建制派又話好難撐政府，結果就搞瓜咗。
今次情況不同，只有一個科技局，而且佢幾時成立無阻政府的運作，即係話立法會鐘意拉布，可以慢慢拉，政府預咗立法會拉布拉半年、一年才剪布都未遲。
吓，拉布半年一年? 咁我又開始為啲尊貴議員擔心，因為次次咁開會，傾埋啲無無謂謂改一兩隻字眼的提案，聽埋啲無聊發言，玩一兩個月已經命都無，點玩半年呀? 我估去到咁上下，不止建制派、溫和泛民私下都會叫曾主席剪布，令大家脫苦海。睇落科技局成事的機會，又會比想像中大番少少喎。
巴士的團隊
