科技局預你拉布半年

梁特首在施政報告話要搞番科技局，正如巴士的團隊早前所講，見到行政會議成員羅范椒芬身郁郁問立法會議員對設立科技局的意見，就知政府有意舊事重提，玩番呢味啦。

想當日梁政府正式上任前，提出成個改組方案上立法會申請撥款，當中包括成立科技局，但最後改組方案被拉布攻勢殺掉。今次政府縮龍成寸，唔搞咁多，只提一個爭議較少的科技局，但據稱范椒向立法會議員探路時，不少議員話自己支持，但估計激進反對派又來拉布，設立科技局好難過關。

聞說政府都計過條數，預咗有人拉布，但如今拉布和前年頗有不同，當時新政府趕住上任，政府改組方案一日未過，好多新人難就位，成個政府都癱咗一半，所以對拉布容忍能力有限，而且立法會曾主席不同意太快剪布，溫和建制派又話好難撐政府，結果就搞瓜咗。

今次情況不同，只有一個科技局，而且佢幾時成立無阻政府的運作，即係話立法會鐘意拉布，可以慢慢拉，政府預咗立法會拉布拉半年、一年才剪布都未遲。

吓，拉布半年一年? 咁我又開始為啲尊貴議員擔心，因為次次咁開會，傾埋啲無無謂謂改一兩隻字眼的提案，聽埋啲無聊發言，玩一兩個月已經命都無，點玩半年呀? 我估去到咁上下，不止建制派、溫和泛民私下都會叫曾主席剪布，令大家脫苦海。睇落科技局成事的機會，又會比想像中大番少少喎。

巴士的團隊

Ariel

** 博客文章文責自負,不代表本公司立場 **

今日有個高檔的亞洲金融論壇，巴士的團隊收到料，前財政司司長梁錦松都有出席呢個活動，仲成為眾人焦點。

有出席者問起阿松係唔係想選特首? 佢來一招太極，話佢老友馬時亨想選就真。再追問阿松你自己選唔選? 佢繼續搵「fit馬」做擋箭牌，笑言馬時亨參選大把握過佢選咁話。

出席者聽到阿松講選特首如此刀槍不入，真係無佢符。不過現場所見，出席論壇的各方猛人雖然多，但係好多人走過來和阿松寒喧，對佢十分熱情，直覺係好多人信阿松係下屆特首參選黑馬。

另外阿松又講起政改和2017普選，雖然而家睇好的人唔多，但阿松係例外，佢估最後阿爺同溫和泛民有機會達成協議，因為溫和泛民如果搞瓜咗，隨時到2047年都無普選。阿爺亦唔想搞喎咗無普選，有意願傾掂佢，所以佢就睇好啦。

巴士的團隊