黃成智因政改的歧見被民主黨踢出黨， 如今和老友民主黨前立法局議員狄志遠，密謀組織一個新的溫和泛民政黨，然後在今年年底區議會選舉及明年立法會選舉參選。
黃成智的新政黨要行第三條路，既不想被激進泛民牽著鼻子走，又不會變成建制派。他們相當選舉導向，這樣就比湯家驊的溫和平台「民主思路」有優勢， 湯大狀無端端連個立法會議員都辭埋，個平台又非選舉導向，在今明兩年的選舉大潮中，無選舉實力的組織，真係無人會理你。
黃成智的新黨網羅了一班民主黨老將，如葵青區議會前主席周奕希及前民主黨總幹事陳家偉。黃成智講過不會主動向民主黨挖角，但如狄志遠根本係佢老友，亦都預咗遲早俾民主黨踢出黨，所以講明一齊玩。 而家仲有三、四個民主黨地區成員主動接觸佢地，打算過檔呢個新政黨。
黃成智和狄志遠是民主黨內的匯點幫，本來和民主黨主流派已經唔係咁親近，再加在選舉排位和政改的紛爭，另起爐灶已成大趨勢。這批人雖然不是太明星級，但在部份地區有較強實力，他們在地區參選和民主黨打對台，勢將拉薄民主黨的選票，話唔埋搞出一個有啲影響力的小黨。
民主黨主席卿姐早前講過，黃成智已非民主黨員，他參選或者組黨，是他個人的事，至於狄志遠是民主黨員，若要組織新政黨，就要退出民主黨。卿姐又話不擔心黃、 狄兩人組織參選會分薄他們的選票。
選舉在政黨內部是一個分餅仔遊戲，政黨支不支持你參選，或者在立法會參選名單中排前排後， 絕對會影響一個黨員勝出的機會，選唔到又等5 年，人生無幾多個5年。民主黨內有不少新生代，年紀都唔細，若然並非黨中央積極培養者，在選戰中只是陪太子讀書，好易心灰意冷，所以黃成智扯起枝旗後，都可能會拉走民主黨一班人，唔好話對民主黨無影響。
Ariel
** 博客文章文責自負,不代表本公司立場 **
