上期講到有新聞從業員用一個眾籌的方式，籌到300萬去搞一個新聞通訊社去做新聞調查。我自己之前同一個內地的天使基金負責人傾過，他覺得香港的眾籌市場發展有好大局限，好難去追得上美國的市場。
他話在互聯網的世代，什麼新嘢都有人搞，眾籌就係其中一個，有人搞出一個平台，等大家將一些創新意念放上去，吸引普羅的人去投資，一方面搞生意的人多了融資的渠道；另一方面，以前一般市民係無機會去做這些初創投資，由於初創投資的資本都好大，過去只有投資基金可以去做。但係在這些新平台上，即使普通人放一萬幾千美金，都可以嘗試做一些初創投資。
概念好新，在美國搞得好勁，在內地亦有好多這類眾籌平台，但係做得成功的，反而係一些互聯網的巨企，例如阿里巴巴，他們已經形成一個平台，例如眾籌拍片有一些已經知名導演，有一些拍電影的計劃，放上平台上，普通人用少少錢都可以參與投資拍片。
這種眾籌的另一個好處就係好多時消費者亦可能係投資者，在内地睇戲的戲票大約是30元人民幣，而投資金額可以少到100元，如果一個觀眾好鍾意咁一個明星或者導演，花了100元人民幣投資入去這部戲，他自己當然會去買飛捧場，亦都可能叫埋一家大細入場觀賞，單係他自己帶動的人流，都可以貢獻超過100元的票房。最後他的投資如果成功的話，都可能只是獲利一百幾十，但係好似大家都有參與，而籌款的行為本身亦都帶動了消費。
呢個朋友覺得香港眾籌市場好難成功的原因，關鍵在於那門生意係本地性定係世界性，如果做出來的生意，主要係針對香港本地，生意的規模相當有限。投入風險資本只係一個細的市場入面，只係做一些初創的生意，其實面對風險係非常之高，由於市場太細，即使成功可能得到的回報亦都好小，吸引力不高，即使唔討論這些籌款行為在香港是否合法，但都唔係咁容易吸納到資本，所以一個眾籌計劃可以吸納到幾百萬投資，呢個絕對不是一個典型。
聽完他講，我都覺得有點滴汗，覺得香港咁細的地方，在互聯網勃興的世界下，想搞嘢真係愈來愈困難。
黃毅力
** 博客文章文責自負,不代表本公司立場 **