一邊打波 一邊打交　

早於七十年代，中美兩國靠「乒乓外交」互伸友誼之手，估唔到四十年後的今日，兩國依然沿用呢招交手，雖然個波改咗做保齡球，但彼此較勁之心昭然若揭，貫徹兩國一邊打波、一邊打交的外交作風。

 

事緣外交部駐香港特別行政區特派員公署網站最近公開一則新聞：月中公署人員在副特派員胡建中率領下，與美駐港副總領事俞天睦及美駐港總領館部分領事官員舉行保齡球迎春聯誼活動。

 

有圖有真相，只見照片中二十多名兩國外交人員係威係勢，站在中央的胡建中與俞天睦則各持保齡球挺胸而立，頗有較勁姿態。不過內文指聯誼活動旨在雙方互致新春問候，增進瞭解、友誼與合作，至於兩隊誰勝誰負則只有當事人才知道矣。

 

今年是中美建交35周年，早前外交部長王毅就發文表明，希望美國妥善處理雙邊關係中的敏感問題，在涉及中國主權和領土問題上，美方要謹慎處理。隨著「佔領中環」發動在即，普選爭議不休的政情下，曾被中方當面警告不要干涉香港內政的美國總領事夏千福，不知會否暗自發功，在普選議題及香港民主進程上，打出擦邊球與中方官員較一較勁？而場邊的西環粉絲又會如何護法？到時大家真係要等睇好戲。

 

巴士的團隊

Ariel

** 博客文章文責自負,不代表本公司立場 **

政改三人組其中兩人譚志源同袁國強，加埋行政會議成員陳智思，昨日到中環推銷政改諮詢派傳單。現場所見律政司司長袁國強派單張時靦靦腆腆，唔識同市民吹水。

佢地在午飯時間派嘢，地點在中環皇后像廣場旁的地鐵口附近。「荀盤強」係資深大狀，律政精英，當然做唔慣呢啲政治工作，只係派單張，唔敢開口撩市民講政改。但佢認為市民唔講嘢唔係政治冷感，可能只係中午趕時間啫。

未婚的袁國強被稱為「荀盤強」，據聞個人能力極高，在行會中講說話極有紋路，甚至有人形容佢係行會中最有料的成員。咁好料當然最啱選特首，但2017年似乎略嫌太早，但未來政治前途未可限量，不過先要學識做政治工作。

講到派單張、主動接觸市民這些事情，的確又唔係傳統精英，特別係袁國強這種人中龍鳳，一時之間可以適應的。

這令人想起一單往事。時為1991年，當時仲叫做御用大狀的李柱銘參加香港首次立法會直選，李馬丁跟住「港同盟」成員到酒樓派宣傳單張，記者見佢嘅表現同今日嘅袁國強一模一樣，又係咁怕醜。市民唔知佢係乜水，對佢愛理不理。李大狀亦唔識得同市民吹水，就好似儍仔咁硬隊單張。不過，其後李大狀經過幾屆選舉，再睇佢落區已經變得如魚得水，談笑風生，與市民打成一片。

所以，凡事都有一個過程，以袁司長這樣的高能人士，相信只要落多幾次區，就唔會再做「怕醜仔」啦。