冷凍人體等復活 根本偽科學

膠仔睇到篇報道，四川有個女作家死咗，家人用75萬人民幣冷藏佢個頭等將來復活，根本發瘟。我唔係咩權威人士，講出嚟無人信，唯有轉述科學期刊，概述一下人體冷藏科技有幾咁荒謬。

加拿大麥基爾大學神經學助理教授Michael Hendricks寫咗篇文，批評人體冷凍技術只係偽科學，嗰啲宣傳可以保存人體等將來復活嘅公司非常賤格，俾啲假希望人以為將來真係有機會復活，呼籲大家唔好信。

佢話近年有唔少人有錢人都唔捨得花花世界，決定死後以液態氮冷藏頭部或者全身，等日後科技夠先進，重新連接腦神經或者復製記憶「重生」。有人更喺瀕死階段已決定冷藏身體，以為咁樣可以更加新鮮，日後復活效果更好，實情等同自殺。

佢多年嚟集中研究一種名為「Caenorhabditis elegans」嘅小線蟲。呢種生物構造非常簡單，全身只有1,000多個細胞，302個神經元連接位置。要造出兩隻基因序列同埋神經連接組合100%相同嘅蟲蟲唔係咩難事，但係咁樣並不等於能夠製造出兩隻個性100%一樣嘅生物。

佢同一班同事試過好多方法，但係全部實驗都以失敗告終。就算兩隻生物基因序列同埋細胞結構100%相同，生存環境相同，遇上同樣情形，兩條蟲蟲嘅活動模式同埋反應都係完全唔一樣。咁簡單嘅生物都無法實現，更何況係複雜到爆嘅人類？換句話說，就算日後有方法從冷凍咗幾十年嘅頭部中復製人類記憶，咁樣都唔算係重生，「你」同原本嘅你已經有好大分別。

最後引《春秋》一節作結，寫道人生追求嘅係「三不朽」，即立德、立功、立言，大意如下：「人生最高成就係樹立德行，其次是建功立業，最後是留下名言。能做到呢幾樣嘢，死後都唔會俾人遺忘，咁樣先叫不朽。」

上邊講咗啲咩，自己參透吓，以下係原文：
http://www.technologyreview.com/view/541311/the-false-science-of-cryonics/

神州快訊

** 博客文章文責自負,不代表本公司立場 **

AP

最近美國加州最近發生連場山火，波及數以千計民居，接近20,000人緊急疏散，仲燒咗好多好多樹，釋出大量二氧化碳，仲燒死唔少動物。膠仔原本諗住場火簡直係生態大災難，跟住就睇到篇報道話場火對自然生態嚟講反而係件好事，簡單講兩句。

有生態學家話唔少野生動物經歷多代進化之後，其實已經習慣咗山火。有翼嘅早就飛走晒，小動物如松鼠同野貓等會鑽入地底，大動物如麋鹿就會走近河流或者山洞避難，食肉動物更會把握機會捕殺想走佬嘅動物。簡單啲講，人類其實幫唔到呢班動物啲乜嘢。

有消防員話最受山火影響嘅動物應該係昆蟲同埋小動物，火場外圍會有好多蟲蟲爬嚟爬去，間唔中見到一兩隻小動物走唔切，大型動物就真係好少見。佢又話最不知所措、最需要救嘅反而係人，成日見到啲人死守喺間屋度唔識走，直到見到消防員嚟到先識執嘢。

另外唔好以為山火只有破壞而無建設，大部份生態學家都同意山火其實就好似個reset掣咁，令受影響地區重新嚟過，甚至加速生物演化嘅速度，有啲植物同埋真菌只會喺山火之後先會發芽生長。專家指美國過去100年嚟過度抑制山火發生嘅機會，最終反而令一啲物種瀕危甚至消失。

以黑紋背林鶯為例，呢種雀仔係一個世紀前周圍都見到。佢哋只會喺短葉松樹上邊築巢，而呢種松樹嘅果實要俾火燒過先會爆開發芽，可以話無山火就無呢種樹。然而因為人類多事幹死都唔俾山火發生，呢種雀可以築巢生蛋嘅地方愈嚟愈少，今時今日已經變成瀕危物種。

睇完呢單新聞，好想同大家分享一則影片，完全就係膠仔嘅感想，不過內容非常粗俗，超多不文字眼，我唔方便放上嚟。片段係美國著名棟篤笑藝人Louis C.K.一次演出片段，俾條link你哋，自己判斷睇唔睇，22分33秒開始。

按此