全球各地有唔少關於斬首嘅文獻同記錄，膠仔整理咗少少同大家分享，學多樣無聊小知識。總括而言，切人個頭落嚟，喺唔同時期有唔唔同意義，以前可能係一項宗教儀式，現代係一種恐嚇手段。
9000年前，南美
最近巴西發現一具推算有達9,000年歷史嘅骸骨，代號為Burial 26，出土時臉上有兩隻斷手交叉擺放。考古學家相信係宗教儀式斬首，唔算係懲罰，甚至可以話係光榮死亡。死者俾人斬首致死，證明斬首行為喺好耐好耐之前已經存在，一直用到今時今日。
Burial 26
公元前1000年，南美
喺Burial 26出土前，人類發現最古老嘅斬首骸骨係秘魯出土嘅Asia 1，一共有三組合共八個頭骨，同時出土一批飾物，相信佢哋都係因為神聖儀式而斬首。同一時期，同樣喺南美，巴西亞馬遜地區嘅阿拉拉印第安人就視斬首為另一樣嘢，只有戰敗嘅人先會咁樣死，勝利者會用一支竿串起頭骨作為戰利品，甚至將死者頭骨整成樂器同飾品等等，宣示戰勝嘅優越感。
公元前八世紀，歐洲
歐洲從何時興起斬首，暫時未有一定說法，總之斬首由始至終都係一種行刑方式。相對於釘十字架，斬首屬於一種較光榮嘅死法。史學家認為，「征服者」英國國王威廉一世喺公元11世紀引進呢種行刑方式至英格蘭，屬門用嚟處決貴族，直到1747年洛瓦特領主Simon Fraser俾人斬首後停止執行。
1400年，日本
日本武士為咗表示光榮兩個字，好少可會投降敵人，打敗仗會「切腹」，即係先喺腹部拮一刀，慢慢向橫拖，動作愈慢表示決心愈大，然後由旁人幫忙喺頸部補多刀，有時斬太深就變成斬首。後來斬首正式成為日本常用嘅處死方法，最殘忍一種係先將受刑者埋入泥土，淨係突出個頭，然後用木刀慢慢咁片個頭落嚟。
18世紀，法國
講到斬首，真係要特別提吓法國。醫生Joseph-Ignace Guillotin認為極刑方式要夠統一，提議使用一個特定裝置去斬首。佢話一刀過斬落去，相對劊子手劈返十刀八刀要人道得多，「斷頭台」（Guillotin）個名就係咁嚟。法國大革命期間斷頭台大派用場，漸漸變成恐怖嘅象徵。
1930年，納粹德國
希特勒統治時期，斷頭台斬首成為納德國用嚟對付不同政見人士嘅方式。1933至1945年間，有多達16,500人俾納粹德軍送上斷頭台。
當代，中東
恐怖組織同埋武裝分子，包括阿蓋達、塔利班、博科聖地同埋伊斯蘭國等都曾發布過斬首影片，嚇到全球民眾鼻哥窿都無肉。另外，除咗沙特阿拉伯之外，其他仍有死刑嘅國家都已經廢除斬首。
神州快訊
** 博客文章文責自負,不代表本公司立場 **
