科學家多年嚟都為膠污染大為頭赤。我以「膠」為號，每言及此都會有啲罪惡感。美國係全球用得最多塑料嘅國家，每年丟棄膠杯多達25億隻，其中只有唔夠10%回收再用，其餘九成都係固體廢物，送去堆填區或者喺海上浮浮吓。美國史丹福大學最近有個突破性發現，膠仔睇完大吃一驚，話有一種麵包蟲可以分解聚苯乙烯，即係製造發泡膠同埋膠袋嘅物料，人類造成嘅問題似乎喺小小昆蟲身上搵到解決方法。
麵包蟲係黃粉蟲嘅幼蟲，因為專食穀物而被視為倉儲害蟲。有講法話呢種蟲蟲蛋白質高，繁殖快，生命力強，有望成為人類「末日糧食」。之前其實已有研究顯示麵包蟲能夠分解聚苯乙烯，史丹福大學嘅研究進一步驗證佢哋分解發泡膠能力有幾高，100條蟲蟲每日可以食到34至39毫克，大約係一粒藥丸咁多。咦，咁其實又唔算食得快喎。
無論如何，蟲蟲食咗發泡膠之後身體健康，部分仲發育得比食其他嘢嘅更肥美，排泄物亦能夠安全轉化為植土，能夠用於耕作；甚至呢啲食膠蟲蟲本身都係一種營養價值極高嘅食物，當然前提係要大家接受佢係一種食物先得。負責人形容今次研究結果為分解全球塑料污染問題打開一道大門。
膠仔覺得呢個發現真係好重要，畢竟過去我哋都因為塑料難以分解頭痛，固體廢物佔據唔少空間，仲產生好多環境問題，例如海洋生物食落肚毒死，雀仔俾膠袋笠住個頭焗死，時有聽聞。而家搵到方法解決問題總教人釋懷點點。當然最根本嘅解決方法，係我哋應該減少使用塑膠物料，唔好再俾膠污染為害眾生，畢竟我哋都係地球嘅一份子，環境禍害最終都要由我哋自己承受架咋。
原文如下：
https://news.stanford.edu/news/2015/september/worms-digest-plastics-092915.html
神州快訊
** 博客文章文責自負,不代表本公司立場 **
