占解解卦點滴
作者: 朱雀神君
自 2014 年，跟隨國師學習文王卦以來，都占過同解過唔少既卦。當中所遇到既人同事都好有趣。
對於自己占又好，其他人占也好，最忌就係心亂心煩、思想混亂。好多時，占卦講求念動，但念動個一下，當你處於一個混亂狀態，出到嚟既卦係會有偏差。
當然，大家都係凡人，都會被七情六慾、危急性、期待感所影響到，所以當我要占卦既時候，我會靜靜地坐一陣，等自己心情平復落嚟先會去占卦。
好多時，朋友們揾我占卦，我會偏向叫佢哋自占之後，再幫佢哋解卦，係可以幫人代占，但我覺得自己念動個一下，對於該事情唔太了解，所以交由問事者去占會比較好。
佢哋占之前，都會幫忙度一度過問題，問題對既卦既影響都比較高。除咗令問事者統一方向之外，解卦者亦都容易判斷事情既立極點。
當然，都可能係自己功力問題，對於代占，小弟並不能容易揾出當中既立極點去解卦。
能醫不自醫，有時候都會出現起自己身上。對於朋友們既卦，可以講解到好多當下既事。但對於自己占既卦，好多時都唔識解。可能夾雜左太多情感落去，所以自己好難去解。
今次就寫住咁多先，下次有時間就再分享更多。感謝感謝。
香港兔蘆術數學會
** 博客文章文責自負,不代表本公司立場 **
加密貨幣仲揸得? 作者: Stephen
“加密貨幣, 又譯密碼學貨幣、密碼貨幣, 是一種使用密碼學原理來確保交易安全及控制交易單位創造的交易媒介……
“ 咪住先, 依度係香港兔蘆術數學會喎. 放心, 我今日唔係同大家講解乜野係加密貨幣, 而係同大家分享一支同加密貨幣有關既文王卦.
話說小弟早前買咗好幾萬粒狗狗幣, 當時買入價係美金 $0.05 一粒. 到四月尾個價已經爆升到美金 $0.4 一粒. 升勢凌厲, 幅度驚人!
攪到我一時間都唔知應該點操作好. 雖則有說法 “有糊唔食, 罪大惡極”, 但係如果個價升唔停, 一個唔覺意升多十倍八倍, 咁咪走寶? 於是我占一支卦, 問下如果我繼續持有狗狗幣, 黎緊巳月既財利會點.
占卦當日係辛丑年, 壬辰月, 己酉日. 寅卯空亡.本卦山地剝, 變卦艮為山. 獨發於三爻. 由於問題同錢銀有關, 用神自然就係妻財.
三爻妻財卯木化兄弟申金回頭剋. 妻財既力量已經受損. 加上日子係酉金, 不單剋財, 而且沖財. 子孫爻子水無發動, 做唔到通關轉化. 四爻父母戌土亦無發動, 解決唔到妻財比日子沖既問題.
再睇下巳月幫唔幫到手? 巳火對妻財卯木既力量完全無幫助! 財既力量弱不禁風!妻財卯木落空亡, 可以有兩個解讀.
第一係空亡唔受剋, 預示我錢財唔會有損失.
第二係日子沖空亡, 沖空解作目標轉移, 表示我會有其他投資對象.
今次依支卦完全幫到我趨吉避凶 ! 占卦之後幾日, 我已經逐步將手上既狗狗幣轉成BUSD. 成功避開由五月開始既大跌浪. 至於我轉移咗去投資啲乜?
梗係參考兔蘆投資WHATSAPP谷啦. 依個谷入面有好多臥虎藏龍既師兄師姐, 佢地既分析直達專業級水平! 如果大家未入谷既, 快啲申請嗱. 當然, 首先你要成為兔蘆學會既一份子啦 !
待續…
