逾半女子鍾意男士剃腳毛

膠仔同朋友出去飲返兩杯吹吹水，席間一班lady指住個鬍鬚勒突嘅佬話佢對腳好白好滑，問佢係咪有剃腳毛。鬍鬚佬支吾以對，氣氛鬼咁尷尬，最後都係唔知有剃定無剃。事後我諗：其實有幾多男仔會剃腳毛呢？我自問無咁嘅人力物力做調查，唯有引述權威網站結果，赫然發現原來有成33%受訪男士會修剪腳毛，另有15%人話會剃得乾乾淨淨。

呢個調查由男士健康資訊網站Men’s Health進行，班編輯仲請埋友站Women's Health問問各位姊妹對男士剃腳毛有咩睇法。結果顯示30%女士鍾意男仔稍為修剪一下腳毛，另外22%人仲話鍾意男士剃得乾乾淨淨。換句話說，超過一半女士都覺得男仔整理吓啲腳毛比較好。網站仲問咗個形象顧問意見，講講點解男士會剃毛。對方回應：「好睇囉！感覺會乾淨啲嘛。」膠仔都補充一點，美感呢家嘢見仁見智。

篇報道其後特意提醒男士，想將腳毛連根拔起，用脫毛蠟紙比較痛，但效果遠比剃刀好。若然想對腳望落更光滑，剃完毛可以搽少少護膚精油。脫毛膏就少用為妙啦，因為質感立黐黐，加上男士皮膚一般比較粗糙，用起嚟效果唔會太好。

最後不得不提，膠仔所引資料係由外國人進行嘅調查，香港情況未必一樣，不喜勿插。話時話，有無傳媒朋友肯做返次調查呢？

最後原文喺呢度：
http://www.menshealth.com/grooming/should-men-shave-their-legs

神州快訊

** 博客文章文責自負,不代表本公司立場 **

上星期Buzzfeed報道咗單罕見醫學個案，有個男人自己俾綠帽自己戴，情節曲折離奇，仲包含少少冷知識，等我簡述一下。

美國34歲男子Dan Vergano舊年同老婆決定用體外採精方式懷孕，即係試管嬰兒。點知DNA驗證結果出嚟之後，佢發現個B竟然唔屬於自己，而係屬於另一個人。 佢勁嬲打算告研究所，但研究員堅持無做錯，強調精子屬於佢本人。

經過進一步化驗，研究員發現BB DNA同Vergano非常相近，但又有點點唔同。換句話說，精子應該係屬於佢兄弟嘅，有研究員隨即諗到呢個男人好可能係個「嵌合人」，佢嘅「兄弟」就存於佢本人體內。

喺遺傳學上，有一個現象叫做嵌合體，英文叫做Chimerism，即係母體內兩粒受精卵融合埋一齊成為一個個體成長，至今全球只錄得30宗嵌合人個案，Vergano係其中一個，體內有10%精子唔屬於佢本人。就係因為咁，佢唔覺意幫體內另一個自己播咗種。

Vergano算係比較幸運嘅一個，剛好同佢合體成長嘅都係男性。醫生話若然兩粒受精卵係異性而又融合埋一齊，嵌合人極有可能出現兩種性徵，咁樣就有排煩啦。

原文喺呢度：
http://www.buzzfeed.com/danvergano/failed-paternity-test-vanished-twin