本網昨日報道一份綜合性收費報紙正在醞釀開辦，出面的搞手是資深報人郭慶榕，而幕後話事人是左派人士蒯(音：拐)轍元。
行家當然關心係咪會多個就業機會啦，政商界都竊竊私語，當然係想八吓幕後的水喉。
部份人士就仍然相信是本地財團，仲形容呢份新收費報紙為「地主報」，不過，聽聞唔少大財團的身邊人都否認自己有份。查實本地財團想搞報紙、電視的傳聞揮之不去，事出有因。
話說97年回歸前後，亞洲電視易手，蝕到入肉的林百欣淡出，內地商家封小平、劉長樂，以及政協常委棋哥(陳永棋)逐步取而代之。期間有本地中間人曾經試圖將一些大財團拉埋一齊，諗過出資玩吓電視架，而且唔係齋吹的階段，都已經去到傾出資幾多的問題，之但係，中間人與當時亞記的牌面話事人封小平接觸過後，對方的訊息相當明確，話唔會賣，所以先變成無米粥。
去到2010年，再有傳聞本地富豪第二代，有意與多個大地產聯手買一份本地報紙嚟做，當時傳媒報道講到似層層咁，去到研究點樣發大嚟搞，但後來消息曝光後，買報之事又係不了了之。
今次吹出再有收費報紙可能出爐，搞親報紙都要講緊每年出幾多億，水喉到唔到位係關鍵，開始大家唔信，但晨報開始大力挖角請人，已到了唔到你唔信的階段。
雖然有傳聞指係北方水，但係主事人出聲明否認，話資金來自本地基金，行內人即刻聯想到同有實力的本地地產財團有關。
我哋就覺得搞傳媒增大自己的話語權，講嘢唔使靠人，又有枝重炮防身，無論係北方富豪，定係本地財主，都有好多人想玩啦。
Ariel
** 博客文章文責自負,不代表本公司立場 **
香港無乜行業好做，最好都係做金牙大狀，新鴻基地產郭氏兄弟涉及前政務司司長許仕仁一案，要等今年5月才開審，不過官司未打，新地二佬江少和三弟聯少請大狀粒粒皆星，夾埋已花了1億5000萬律師費，真係可以用「得人驚」三個字去形容。
江少花費最鉅，行內估佢已經用咗1億律師費，主要係大狀收。江少用咁多錢，皆因佢個法律團隊中御用大狀(英國外聘)和資深大狀(本地)最多，計有英國女御用大狀Clare Montgomery，佢曾為毛玉萍及林炳昌打終審法院上訴案，另外還有香港資深大狀駱應淦、夏偉志和余承章。單是自去年7月開始包起英國重炮Clare Montgomery為佢打官司，已使咗3000萬。
聯少用的英國御用大狀是John Kelsey Fry及香港資深大狀麥高義，由於資深大狀無江少咁多，估計律師費經濟一點，至今約用了5000萬。少少地都5000萬啦。
至於已被頒令破產的許老爺，就無咁多錢請資深大狀，只是請了本地大狀蔡維邦，外界本來估佢會用法援署的大狀，但佢又無用，相信要由許太支付律師費，咁當然好難請得起資深大狀打咁耐官司啦。
至於政府的律師團隊也是黃金陣容，用的是英國御用大狀David Perry和香港資深大狀謝華淵，政府用公家錢打官司，多多錢都出得起。政府之前請過David Perry打陽明山莊殺夫案和陳振聰偽造遺囑案，兩單都入罪，十分之強勁。
行內稱呢單為「世紀刑事官司」(講花費一定係)，未開審律師都咁驚人，皆因新地兩兄弟請得御用大狀和資深大狀多，而且好多都係全面包起佢地，叫佢地打新地案期間唔好接其他官司，全力去打呢單案，再加上英國過來的御用大狀又包食住五六星級酒店和機票，條數計起上來十分驚人。
睇完呢單嘢，有無諗住谷個仔女去讀law呢?
