王宗堯（Greg）、陳詩慧（Eva）及周家怡日前惡搞電影版《十月初五的月光》，遠赴橫店拍攝一段可歌可泣的三世騎呢愛情故事《足膝好》。早前踢波仆親的Greg負傷上陣，其中Eva更要為Greg吮膿。
Greg早前踢波仆親，膝頭哥傷得勁金，行路都一柺柺。於電影中有鋪舔膿癖的Eva說：「Greg係傷咗，第一晚佢有包紮傷口，但一拆出嚟時，大家見到嗰劈膿真係嘔。不過Greg真係好好，千山萬水走幾百級樓梯去拍嘢，簡直不辭勞苦，佢同家怡兩個係好到不得了，對我好好，可能佢哋見我太坎坷，所以想盡辦法捧我做女主角，哈哈！」
Greg表示今次和Eva、潘漫紅及幾位朋友去橫店探望在當地拍戲的家怡時，在行山時大家突然技癢又靈機一觸，就構思出這個三世姻緣故仔，他笑說：「又可以順便幫陳詩慧宣傳吓，因為嚟緊佢要出碟，佢想打破一如既往慣有嘅自以為靚女形象，我哋想捧佢做女笑匠，所以佢今次做『吮膿女』；另外係因為公司本身有《十月初五的月光》呢套戲，萬一得罪咗，老闆都唔會炒我魷魚。」
「吮膿女」陳詩慧邊行邊舔，令家怡即刻作嘔噴飯。
此外，連兩張經典官方海報都學到足Eva飾演的「紫煙」，要孭住Greg飾演的「拮哥哥」，兩款海報拍埋100%吻合Eva 提起拍海報就哈哈笑：「我冇腳震架，我本身個人都好大力，但我都驚訝可以孭得起王宗堯！」
