孖陳家樂任「Global 6K for Water」大使預告落場一齊跑 周家怡提起助養20年「仔女」眼濕濕

世界宣明會全球性籌款活動「Global 6K for Water」，去年在香港首辦已獲得大批市民善心支持。為繼續支持非洲缺水社區的水利衛生工作，香港世界宣明會將於今年12月14日再度假金鐘添馬公園舉辦第二屆香港「Global 6K for Water」(G6K)，緊接馬來西亞、韓國、日本及新加坡的亞洲區G6K跑，共同關注水資源危機！大會更邀得周家怡及陳家樂擔任活動大使，日前兩人為活動拍攝宣傳片及海報。

周家怡及陳家樂擔任「Global 6K for Water」活動大使。

藉着「Global 6K for Water」，每位參與者將透過跑步或步行，體驗每日徒步約6公里取水，而每塊號碼布亦配對了一位缺乏清潔食水的孩童，參與者的汗水與付出，直接為該孩童身處的缺水社區改善水利衛生設施，使區內所有兒童與居民受惠。

周家怡、陳家樂

為使周家怡及陳家樂認識更多有關宣明會的水利衛生工作，大會特別設計「G6K撲水大作戰」小遊戲，過程中兩人需抬起重量達10公斤的水桶步行到答題區。兩人事後受訪時，周家怡笑謂：「好辛苦！啲小朋友要日日咁攞，仲要唔係有條河畀佢哋打水，係喺個水氹仔度裝。」陳家樂表示水桶非常重，看過當地孩童取水的片段，更聯想到女兒Camila：「頭先睇（紀錄）片見到好多小朋友，仲要係細路女，赤腳行好遠，攰到左手換右手、右手換左手，仲要擺上頭頂住，想像個女如果要咁，真係好肉赤。」他又期待將來可以隨宣明會到當地，親身感受他們的生活。

陳家樂

陳家樂

問到他們可有「缺水」體驗？陳家樂表示慶幸未試過，但曾到衛生情況較惡劣的地方拍攝：「啲廁所好污糟，我唔係好想去又唔係好敢飲水，搞到身體都差咗，我先知水對身體真係好重要。」周家怡試過到簡陋地區拍攝，因為落雨場口動用水車，當地村民全都邊圍觀邊哭：「佢哋覺得我哋好嘥水，嗰個場面真係好深刻，事後監製都好好，買多兩車水畀村民用。」

陳家樂

陳家樂

提到跑步，周家怡每星期最少跑三、四日：「我冇咩目標，唔會追時間，都係為咗健康。我啱啱先知全球有22億人有缺水問題，會大力介紹畀跑友知，等佢哋一傳十、十傳百，多啲人一齊參與Global 6K for Water。」陳家樂曾因追求更快時間，而出現傷患：「用咗錯嘅方法跑，之後都跑少咗，而家識得慢慢跑，享受跑步嘅過程。我會介紹Global 6K for Water畀陳茂賢導演，因為佢肥咗好多，哈！希望可以令佢重拾跑步嘅樂趣，加上佢係導演，可以一呼百應，叫晒佢啲班底去參加。」

周家怡

周家怡

周家怡除了是「Global 6K for Water」的活動大使，同樣是宣明會的助養者。已參與助養計劃二十年的她，帶同一大疊與助養小朋友的書信，邊做訪問邊翻開，不時眼濕濕兼流露滿足笑容。回憶首次參與助養計劃，周家怡說：「好似係電視播啲小朋友嘅生活，跟住就話『每日只需幾多錢』我覺得唔可以扮睇唔到，因為我真係睇到啦嘛，所以就打電話去宣明會。」

周家怡

周家怡深受助養孩童的書信感動：「有啲好鍾意畫畫，會用晒顏色筆寫信畀我，又會同我分享攞到高分、好成績，好窩心，係因為佢會話我聽。好似知道你助養佢，佢都好努力㗎，雖然大家冇血緣關係，然後你少少奉獻，就可以令另一個家庭有更好嘅生活，呢個係好應該要做嘅嘢。」說罷不禁眼濕濕，周家怡助養過烏干達、埃塞俄比亞、孟加拉等等不同地區的孩童：「我只係奉獻好少（嘅事），錢好少事，我成日話個力好緊要，要有個人喺當地落手落腳去做。中間我都有啲經濟狀況，感恩係自己好好彩，同自己講『食少一、兩餐，我得嘅！』，我會好堅持。雖然而家都窄窄地，我供緊樓呀，哈哈。」

周家怡深受助養孩童的書信感動。

最令周家怡感動的是孩童們的轉變，由第一張相表情不太自然，到後來愈來愈好，會感覺到同小朋友關係增進，愈來愈熟悉大家，「我覺得小朋友成長最重要係快樂，令佢對生命好期待、好有好奇心，而唔係佢負責孭起頭家去擔水。」周家怡亦會與助養孩童通信，「主要寫啲好簡單嘅祝福，可能畀啲書簽、貼紙佢哋，我覺得係一個鼓勵。見到佢哋都好鍾意返學，有學返好開心、屋企買咗隻牛好開心，會覺得分享愛，自己都好幸福。我聽過有啲被助養嘅小朋友，大個咗之後加入宣明會，好好吖。」

周家怡最感動的是孩童們的轉變。

周家怡笑言很想親身探訪助養小朋友，但擔心自己眼淺落淚：「我好想去同佢哋玩，但係又驚自己忍唔到（喊），唔想令佢哋覺得『係咪覺得我好慘？』嗰種，唔想有比較。」最後，宣明會邀請她拍片予助養兒童，周家怡即興奮表示：「真係畀返佢哋睇㗎？好吖！」又呼籲大眾參與助養計劃，期待更多人能分享愛。

周家怡很想親身探訪助養小朋友。

但擔心自己眼淺落淚。

第二屆香港「Global 6K for Water」將於12月14日假金鐘添馬公園舉行，屆時周家怡、陳家樂亦會落場參與，各位有心有力的香港人一齊參與Global 6K，為家家有水踏出一步，現已經開始接受報名，名額有限，把握機會行動啦！

陳家樂、周家怡

第二屆香港世界宣明會「Global 6K for Water」

日期：2025年12月14日
地點：金鐘添馬公園
時間：早上7時 – 下午4時
活動設有個人跑（6公里）、個人/親子/組合跑（3公里）及開心漫步組（1公里步行），場內設攤位遊戲及展覽
官方網站：https://www.worldvision.org.hk/global6k

ViuTV原創劇《日落下的彩虹》逢星期一至五晚上9時30分播出。劇集以七個發生在彩虹之下、細膩動人的小故事，編寫各種情感與遺憾，建構香港人的屋邨情懷。當中由不同人物串連不同故事，阡陌交錯，並穿插彩虹邨進入倒數的命運，引發現實共鳴。

《日落下的彩虹》劇照

《日落下的彩虹》劇照

(左起)二姐區家瑤（周家怡 飾）、三弟區家齊（梁業 飾）、大哥區家樂（強尼 飾）和媽媽蘭姨（吳浣儀 飾）

上周五（31日）播出的一集將會講述蘭姨和三兄姊弟的故事

上周五（31日）和周一（3日）的一集，講述蘭姨（吳浣儀 飾）和其三個子女：大哥區家樂（強尼 飾）、二姐區家瑤（周家怡 飾）和三弟區家齊（梁業 飾）的家庭故事。今次的拍攝令眾人也有所得著，周家怡分享指：「一家人唔好計較咁多，要成日提自己珍惜大家嘅關係。其實所有關係都可以突然間無咗，有嘅時候就唔好拗咁多，人係特別容易為少少嘢就會辣著。屋企係一個唔應該講對錯嘅地方。如果感覺到對方嘅情緒開始激動，你就唔好同佢硬要爭贏，又或者如果做到嘅話，轉個頭先講」。

飾演大哥的強尼指：「人某個時候去咗個矛盾位，通常就冇咁容易重新打開返嗰道門。好慶幸經歷咗呢兩集嘅拍攝，好開心可以經歷一個咁嘅過程，因為現實生活真心未必咁容易可以做得到。」而ERROR成員肥仔現時不再跟家人同住：「𠵱家開始自己出嚟住，我覺得要識得返屋企，間唔中有咩事都要諗起阿爸阿媽。其實唔需要做好多好複雜嘅嘢，食餐飯、傾個計，或者間唔中打個電話，都係一種窩心。」作為媽媽的吳浣儀說：「做阿媽就盡量真係唔好偏心。我有四個小朋友，盡量冇偏心，但有時可能佢哋會自己比較。」

談到維繫家庭關係，吳浣儀覺得溝通很重要，「我覺得就算一家人，有咩唔開心嘅嘢盡量講出嚟。」強尼謂：「我反而覺得好似咁樣嘅家庭組合，當大家年紀漸漸都大嘅時候，就係接受變化。因為大家喺唔同嘅時間會遇上自己嘅困難，個個人都會變，唔好諗住細個嗰時係點。真係要接受個變化，啲嘢就會坦然少少。」吳浣儀也同意：「好似啲長輩成日當你係細路仔嗰陣時咁樣，『嘩！你突然間搏我嘴』，就好唔鍾意。要接受人喺唔同嘅階段有佢自己嘅生活，要理解佢」。