美國著名DJ Peter Tripp曾經喺1959年以挑戰人體極限嘅方式籌款，於紐約時代廣場打造一間玻璃房，連續八日又八小時馬拉松式直播節目。當年有人記低佢身體同埋心理轉變，成為經典醫學及心理學案例。
Tripp挑戰連續多日唔瞓時32歲，無病無痛，身體狀態算唔錯。頭兩日佢仲係精神奕奕，久不久講吓笑，聽眾同埋同事都覺得佢表示正常，但第三日就出現明顯變化，開始亂鬧人同埋出現幻覺。
佢最先以為自己對鞋長滿蜘蛛網，到100小時左右就話身邊其他人係昆蟲。再過大約一日，佢返上酒店換衫，換換吓忽然衝落街求救話見到衣櫃着火，實情咩都無發生。有醫生上前為佢檢查，佢堅持自己睇到衣櫃噴火，粗口爛舌鬧醫生設陷阱整蠱佢，神智明顯已經失常。
不過呢項挑戰仍然繼續。喺最尾嗰幾十小時，Tripp堅持開咪廣播，但係語句非常含糊，唔係靠得非常近都唔可能聽到佢噏乜。同時佢幻覺愈嚟愈嚴重，一度以為其他人想落毒害佢、懷疑自己身份係唔係Peter Tripp，甚至簡單任務如順序讀出A到Z 26個字母都失敗。佢喺最後一日嘅早晨，甚至連自己係生定死都搞唔清楚，以極含糊言辭多謝醫生入房幫佢收屍。
經歷201個小時不眠不休，醫生宣布結束玩命大挑戰，成功創下一項新世界紀錄。事後Tripp陷入深層睡眠13小時，記憶返晒嚟，再無任何失常表現。呢個個案為日後治療失眠同埋研究睡眠不足提供大量寶貴資料，不過當中涉及兩個問題：首先呢個實驗係喺公眾地方進行，未知群眾壓力對佢有咩影響；另外喺最後66小時，Tripp服用大量藥物防止瞓着，難以判斷藥物對睡眠不足有何影響。
根據2010年一項研究，人24小時唔瞓覺，活動表現已經等同血液酒精濃度達到0.1%。喺美國大部分地方而言，0.1%酒精已經屬於醉飲酒。另有醫學研究指出，連續36小時唔瞓，人嘅記憶會開始受損，愈嚟愈難控制脾氣，說話失去邏輯。醫生提醒，長期缺乏睡眠更容易誘發糖尿病、中風同埋抑鬱症等。
原文：
https://books.google.com.hk/books?id=rFVWBQAAQBAJ&pg=PT282&lpg=PT282&dq=the+men+who+didn%27t+sleep+the+story+of+peter+tripp&source=bl&ots=zwMmPb9UJY&sig=pnydWe28IOb5hxrW2cnY49QugTc&hl=en&sa=X&redir_esc=y#v=onepage&q=the%20men%20who%20didn't%20sleep%20the%20story%20of%20peter%20tripp&f=false
神州快訊
** 博客文章文責自負,不代表本公司立場 **
第一次世界大戰喺1918年11月結束，傷亡人數以千萬計。直到近百年後嘅今日，人類仍然犯緊相同錯誤打生打死，但不得不承認戰爭大大加速咗科技發展。喺當代人眼中，一戰時期同盟國同協約國兩大陣營嘅戰爭科技真係騎呢又落後。英格蘭帝國戰爭博物館近日將當年一批戰鬥裝備照片整理成《騎呢的一戰》（Weird War One）一書，以下係部分「精華」。
呢個裝置為德軍採用，戴上後可以更清楚聽到炮擊聲同埋睇到閃光，有助判斷敵方位置。
呢嚿嘢望落相當笨重，以前軍人就係靠佢擋子彈。
美索不達米亞皇家炮兵隊偵察兵用「移動高梯」進行偵察。喺沙漠戰中，偵察位置愈高效果愈好。
英國軍隊喺敵方佔領區投下「白鴿傘兵」，請當地民眾寫低敵軍位置綁好放生，以為隻鴿會飛返英軍基地。德國軍隊無幾耐就洞悉咗佢哋嘅計劃，捉到後換成另一隻白鴿，假扮英軍軍鴿將情報平安送返德國。
美國海軍救生衣不足時，士兵會喺身上捆上床墊，必要時可以保命。
德國士兵踩單車發電維持通信同燈光。
美國海軍訓練營新兵時，靠呢個大喇叭下達集合指令。
以前狙擊手和同埋偵察兵會匿喺呢啲由帆布同埋鐵絲製成嘅障礙物內。
澳洲工程師用木同埋帆布製作嘅假坦克，軍隊進攻時走在最前。
一隻德國偵察白鴿穿上「鎧甲」執行任務，胸前係部攝錄機。
打仗時偽裝得再巧妙都有可能俾敵軍發現，好似呢位土耳其狙擊手咁。
美軍1917年嘅偽裝實驗現場，好明顯係個失敗作。
1915年戰爭開始前，唔少國家嘅騎兵隊打算以踩單車取代騎馬，開戰後先發現單車喺壕溝戰中作用有限。
最後奉上原文：
http://www.dailymail.co.uk/news/article-3326359/Weird-War-One-Parachuting-pigeons-Wooden-tanks-riveting-new-book-Imperial-War-Museum-unearths-wackiest-inventions-WWI.html
