日本近年成為新興威士忌產國，膠仔早排去當地旅行都想買支威士忌俾個酒鬼老友做手信。點知店員問我要隻點嘅酒、幾多度、咩年份、咩口感等等。我咩都唔識，只能O嘴望住個店員，結果店員就更加專注咁望住我等我答，認真尷尬！因為呢件事，我返香港第一件事就係惡補咗少少威士忌入門知識，辛辛苦苦睇完後整理咗少少資料。大家睇完都可以喺朋友面前扮吓代表啦！
應該係Whiskey定係Whisky？
威士忌英文串法係Whiskey定係Whisky？其實兩個都啱，只係唔同國家有唔同習慣。大部分蘇格蘭、日本同埋加拿大生產商會用Whisky；愛爾蘭同埋美國生產商就多數用Whiskey。當然都有例外，好似美國Maker's Mark咁就係用Whisky啦。
產自邊一度？
威士忌主要產自蘇格蘭、愛爾蘭、加拿大、日本同埋美國，但係到底係邊個區域嘅酒廠生產嘅呢？答案通常可以喺樽底睇到。呢點好重要，就算同樣係蘇格蘭威士忌，但係北部酒廠同埋南部酒廠嘅成品喺口感、色澤同埋香味方面都可以完全唔同。
酒精度數有幾高？
酒樽標籤通常一定印有酒精度，但係唔同地方有唔同嘅標示方式，一種係「Alcohol By Volume」，即係酒精所佔百分比（例如46% Vol）。另一種寫法係「Proof」，將數字除以二就可以知道酒精含量有幾高，如係寫住80 Proof，咁就等於40% Vol.啦。
咩年份？
認識呢一點對買入較貴嘅酒時特別重要，買之前上網查吓隻酒嘅年份資料，咁就可以避免俾人搵笨。同紅酒一樣，唔同地方威士忌嘅「理想年份」都有唔同，氣候溫暖或寒冷亦會影響釀造嘅效果。普遍嚟講，蘇格蘭、愛爾蘭、日本同埋加拿大威士忌都要入桶至少三年先會「出味」。美國波本威士忌無陳年時限，但係「純波本」就要至少存兩年。
單一麥芽（Single Malt）定調和型（Blended）好？
通常買蘇格蘭威士忌都要留意吓呢樣。「單一麥芽」即係一間蒸餾廠100%以發芽大麥為原料製造，每一種味道都非常獨特、香味非常濃烈。「調和型」即係低度麥芽同穀物威士忌嘅混合物，口味較溫和，大部分「新手」都會由「調和型」開始學飲。
酸醪（Sour Mash）係乜？
「酸醪」係波本威士忌專用術語，指製造原料正進行發酵時，加入已去除酒精成分嘅啤酒，另有一番風味。
神州快訊
** 博客文章文責自負,不代表本公司立場 **
美國著名DJ Peter Tripp曾經喺1959年以挑戰人體極限嘅方式籌款，於紐約時代廣場打造一間玻璃房，連續八日又八小時馬拉松式直播節目。當年有人記低佢身體同埋心理轉變，成為經典醫學及心理學案例。
Tripp挑戰連續多日唔瞓時32歲，無病無痛，身體狀態算唔錯。頭兩日佢仲係精神奕奕，久不久講吓笑，聽眾同埋同事都覺得佢表示正常，但第三日就出現明顯變化，開始亂鬧人同埋出現幻覺。
佢最先以為自己對鞋長滿蜘蛛網，到100小時左右就話身邊其他人係昆蟲。再過大約一日，佢返上酒店換衫，換換吓忽然衝落街求救話見到衣櫃着火，實情咩都無發生。有醫生上前為佢檢查，佢堅持自己睇到衣櫃噴火，粗口爛舌鬧醫生設陷阱整蠱佢，神智明顯已經失常。
不過呢項挑戰仍然繼續。喺最尾嗰幾十小時，Tripp堅持開咪廣播，但係語句非常含糊，唔係靠得非常近都唔可能聽到佢噏乜。同時佢幻覺愈嚟愈嚴重，一度以為其他人想落毒害佢、懷疑自己身份係唔係Peter Tripp，甚至簡單任務如順序讀出A到Z 26個字母都失敗。佢喺最後一日嘅早晨，甚至連自己係生定死都搞唔清楚，以極含糊言辭多謝醫生入房幫佢收屍。
經歷201個小時不眠不休，醫生宣布結束玩命大挑戰，成功創下一項新世界紀錄。事後Tripp陷入深層睡眠13小時，記憶返晒嚟，再無任何失常表現。呢個個案為日後治療失眠同埋研究睡眠不足提供大量寶貴資料，不過當中涉及兩個問題：首先呢個實驗係喺公眾地方進行，未知群眾壓力對佢有咩影響；另外喺最後66小時，Tripp服用大量藥物防止瞓着，難以判斷藥物對睡眠不足有何影響。
根據2010年一項研究，人24小時唔瞓覺，活動表現已經等同血液酒精濃度達到0.1%。喺美國大部分地方而言，0.1%酒精已經屬於醉飲酒。另有醫學研究指出，連續36小時唔瞓，人嘅記憶會開始受損，愈嚟愈難控制脾氣，說話失去邏輯。醫生提醒，長期缺乏睡眠更容易誘發糖尿病、中風同埋抑鬱症等。
原文：
https://books.google.com.hk/books?id=rFVWBQAAQBAJ&pg=PT282&lpg=PT282&dq=the+men+who+didn%27t+sleep+the+story+of+peter+tripp&source=bl&ots=zwMmPb9UJY&sig=pnydWe28IOb5hxrW2cnY49QugTc&hl=en&sa=X&redir_esc=y#v=onepage&q=the%20men%20who%20didn't%20sleep%20the%20story%20of%20peter%20tripp&f=false
