Plastic
膠仔努力減緊肥，食少咗又跑多咗，近日開始有成效，搣甩唔少肥肉。近日天氣轉涼，減肥效果仲可以事半功倍。最新一項研究發現，低溫環境有助人體產生「好」嘅褐色脂肪，另外仲可以改變腸道細菌種類，加速燃燒脂肪，減重更快。
呢個研究由瑞士日內瓦大學進行，唔係英國研究，相對地有參考價值。研究員發現人活動最多嘅地方，包括手腳同埋頸部，都有較多褐色脂肪，較其他位置更容易操出線條；至於腰間同屁股等較少活動嘅位置則有較多白色脂肪，亦係發福時首先膨脹嘅地方。研究報告指出，若然一個人唔太願意活動，單靠節食效果都唔會太好。佢哋又仲做咗少少統計，發現生活喺環境溫度較低嘅人，身上儲存嘅褐色脂肪較多，唔排除低溫有助形成「好」脂肪。
研究員又將一批白老鼠放入溫度只有攝氏6度嘅環境中生存10日，其間食物供應如常，事後發現呢批老鼠腸道細菌出現重大變化，成功阻止體重上升。科學家再將新形成嘅細菌移植到另一批喺20度生活嘅老鼠身上，細菌同樣對控制體重起到關鍵作用。
神州快訊
** 博客文章文責自負,不代表本公司立場 **
今日諗唔到寫乜，膠仔只好向Google大神請教吓啲無聊知識。喺搜尋列輸入「Do birds ……」（雀仔會唔會……），自動彈出以下結果。我逐個望，發現啲內容勁有趣，一於開返個「無聊10問」，試試用最少字數講最多小知識。
雀會放屁嗎？
鳥類消化食物速度勁高，加上肚道細菌同其他動物唔同，消化過程中唔會產生氣體，無屁放。
雀會屙尿嗎？
雀仔唔會屙尿，所有廢物都係由同一個「洩殖孔」排出體外，屎中帶尿。
雀仔會唔會瞓覺？
會呀，飛行途中仲可以俾一邊大腦休息，另一邊保持清醒，所以候鳥遷徙連續飛幾十日都無問題。
雀仔企喺高壓電纜上點解唔電死？
雀鳥之所以能夠停喺高壓電纜而唔會電死，係因為身體無「接地」（同其他物件接觸），小小身體同電纜間嘅電壓差並不足以產生電流，無電流的話就無殺傷力。不過如果隻雀企喺電纜嘅同時，又同另一件連接地面嘅物件有接觸，保證燒鳥。
雀仔會唔會中閃電？
如果雷電擊中大樹，樹上雀仔就慘啦。點解？上邊已經講咗。
雀仔有無耳？
有兩隻，藏喺頭部羽毛之下。
雀仔如何交配？
過程好短暫，男上女下，進入，完。
雀仔會唔會生虱？
會，仲會生螨、蠅等至少有41個品種寄生蟲。
雀仔點解要遷徙？
主要係要尋找適合嘅居住環境，有科學家亦認為係為咗遠離父母，好似部分人大個咗想搬出去住一樣。
雀仔吱吱喳喳叫有咩意思？
最多時係為咗同同類嬉戲以及求偶，每種雀都有獨特「鳥語」，以唔同頻率表達唔同意思。
