今日諗唔到寫乜，膠仔只好向Google大神請教吓啲無聊知識。喺搜尋列輸入「Do birds ……」（雀仔會唔會……），自動彈出以下結果。我逐個望，發現啲內容勁有趣，一於開返個「無聊10問」，試試用最少字數講最多小知識。
雀會放屁嗎？
鳥類消化食物速度勁高，加上肚道細菌同其他動物唔同，消化過程中唔會產生氣體，無屁放。
雀會屙尿嗎？
雀仔唔會屙尿，所有廢物都係由同一個「洩殖孔」排出體外，屎中帶尿。
雀仔會唔會瞓覺？
會呀，飛行途中仲可以俾一邊大腦休息，另一邊保持清醒，所以候鳥遷徙連續飛幾十日都無問題。
雀仔企喺高壓電纜上點解唔電死？
雀鳥之所以能夠停喺高壓電纜而唔會電死，係因為身體無「接地」（同其他物件接觸），小小身體同電纜間嘅電壓差並不足以產生電流，無電流的話就無殺傷力。不過如果隻雀企喺電纜嘅同時，又同另一件連接地面嘅物件有接觸，保證燒鳥。
雀仔會唔會中閃電？
如果雷電擊中大樹，樹上雀仔就慘啦。點解？上邊已經講咗。
雀仔有無耳？
有兩隻，藏喺頭部羽毛之下。
雀仔如何交配？
過程好短暫，男上女下，進入，完。
雀仔會唔會生虱？
會，仲會生螨、蠅等至少有41個品種寄生蟲。
雀仔點解要遷徙？
主要係要尋找適合嘅居住環境，有科學家亦認為係為咗遠離父母，好似部分人大個咗想搬出去住一樣。
雀仔吱吱喳喳叫有咩意思？
最多時係為咗同同類嬉戲以及求偶，每種雀都有獨特「鳥語」，以唔同頻率表達唔同意思。
神州快訊
** 博客文章文責自負,不代表本公司立場 **
日本近年成為新興威士忌產國，膠仔早排去當地旅行都想買支威士忌俾個酒鬼老友做手信。點知店員問我要隻點嘅酒、幾多度、咩年份、咩口感等等。我咩都唔識，只能O嘴望住個店員，結果店員就更加專注咁望住我等我答，認真尷尬！因為呢件事，我返香港第一件事就係惡補咗少少威士忌入門知識，辛辛苦苦睇完後整理咗少少資料。大家睇完都可以喺朋友面前扮吓代表啦！
應該係Whiskey定係Whisky？
威士忌英文串法係Whiskey定係Whisky？其實兩個都啱，只係唔同國家有唔同習慣。大部分蘇格蘭、日本同埋加拿大生產商會用Whisky；愛爾蘭同埋美國生產商就多數用Whiskey。當然都有例外，好似美國Maker's Mark咁就係用Whisky啦。
產自邊一度？
威士忌主要產自蘇格蘭、愛爾蘭、加拿大、日本同埋美國，但係到底係邊個區域嘅酒廠生產嘅呢？答案通常可以喺樽底睇到。呢點好重要，就算同樣係蘇格蘭威士忌，但係北部酒廠同埋南部酒廠嘅成品喺口感、色澤同埋香味方面都可以完全唔同。
酒精度數有幾高？
酒樽標籤通常一定印有酒精度，但係唔同地方有唔同嘅標示方式，一種係「Alcohol By Volume」，即係酒精所佔百分比（例如46% Vol）。另一種寫法係「Proof」，將數字除以二就可以知道酒精含量有幾高，如係寫住80 Proof，咁就等於40% Vol.啦。
咩年份？
認識呢一點對買入較貴嘅酒時特別重要，買之前上網查吓隻酒嘅年份資料，咁就可以避免俾人搵笨。同紅酒一樣，唔同地方威士忌嘅「理想年份」都有唔同，氣候溫暖或寒冷亦會影響釀造嘅效果。普遍嚟講，蘇格蘭、愛爾蘭、日本同埋加拿大威士忌都要入桶至少三年先會「出味」。美國波本威士忌無陳年時限，但係「純波本」就要至少存兩年。
單一麥芽（Single Malt）定調和型（Blended）好？
通常買蘇格蘭威士忌都要留意吓呢樣。「單一麥芽」即係一間蒸餾廠100%以發芽大麥為原料製造，每一種味道都非常獨特、香味非常濃烈。「調和型」即係低度麥芽同穀物威士忌嘅混合物，口味較溫和，大部分「新手」都會由「調和型」開始學飲。
酸醪（Sour Mash）係乜？
「酸醪」係波本威士忌專用術語，指製造原料正進行發酵時，加入已去除酒精成分嘅啤酒，另有一番風味。
