金融才俊的人生｜刁佬

上回《金融才俊與罅星》引來好多讀者迴響，刁佬決定再添食。好多時大家在媒體上見到的金融才俊，我們發現都是與「市場活躍人士」經常掛勾。一般來說有錢的老闆越低調，有錢的老闆會請無錢的人去做「炒鬼」，自己躲於幕後。

在香港維持市場秩序，藉著進行市場活動來干預股票的實際供求、價格或交投量，是法治之外的活動，證監會是不允許，不過高風險高回報，重賞之下必有勇夫。總有「炒鬼」，不不不，「金融才俊」以身犯險。以身犯險的事做得一次，無被人拉係好彩，不過做得多始終「獵犬終須山上喪，將軍難免陣前亡。」

因此當「金融才俊」賺到大錢後，都想金盆洗手，不再做「金融才俊」，過返啲安落日子。如果繼續做「金融才俊」，多數都係未上到岸，才會繼續做「炒鬼」，一係就喜歡做賊。

無錢的「炒鬼」為左氹人落疊，揸拉利戴撈刷存在感，過住夢幻般的生活。因為Sam Hui，即係心虛，「金融才俊」一定著到身光頸靚，同保險經紀一樣，經營一個外表好掂的景象。如果管錢管得掂，都管自己錢啦，仲點會係條街度吸金？撈得掂的基金經理，多數都係爛身爛世，「大隱隱於市」。如果佢自己都撈唔掂，你畀錢佢管難道會掂？

其實呢樣嘢亦好弔詭，如果做保險經紀做得好掂而身光頸靚，即係佣金收得多，羊毛出自羊身上，作為身光頸靚的保險經紀客戶，難道會好掂？經典的財經書《客户的遊艇在哪裏》（Where Are the Customers' Yachts）亦曾說過一個經典故事：一個鄉下佬去到紐約金融區，見到遊艇全部都插住投資大行及基金公司的旗幟，鄉下佬天真地問：「投資大行及基金公司都這麼有錢，那麼他們客戶的遊艇在哪裡？」導遊搔搔頭：「客户的遊艇？客戶無遊艇。」

刁佬曾經見過唔少「炒鬼」，剛賺到一筆錢就走去供拉利，結果架拉利剛揸左一年，就斷供，被人拖走。因此刁佬經常都話，金融呢一行做得耐同做得長，比一下子賺得多重要。

刁佬工作室

** 博客文章文責自負,不代表本公司立場 **

大眾心目中覺得金融才俊經常溝明星模特兒，事實上經常被傳媒報導的「金融才俊」，好多都係行內俗稱的「炒鬼」。因此刁佬都好唔中意被人誤稱為「金融才俊」，真係金咩融才咩俊。

事實上金融才俊都唔係成日經常溝明星模特兒，亦唔係成日溝暗星，而是位於明星及暗星之間的「罅」，俗稱「罅星」。為何溝「罅星」？因為明星溝唔到，暗星唔想溝，又要出名，因此溝「罅星」。這類金融才俊同保險經紀、傳銷的心態一樣，跑車、名錶及緊身西裝是基本，要身光頸靚，被人外表睇起來好掂，最緊要有個夢幻般的朵，先可呃水魚課金。「罅星」有一定知名度，同「罅星」一齊，有人寫，便可起朵。說穿了「罅星」都係一件道具。

有一位多年前出現於陳姓男星閃卡事件的女主角，多年前經常被傳媒報導與「金融才俊」拍拖，現在女主角效力於「金融才俊」的老闆，而「金融才俊」現在成為南非金礦Sales一名。

刁佬與「金融才俊」有一面之緣，食緊飯時枱面七部電話，疊完又排，排完又疊，好似打緊天九誓要由「雜章」湊成「至尊」，一睇就知係「炒鬼」。本身刁佬都想忖下佢，乜你而家玩緊天九呀？不過心諗佢都唔識聽中文，又要解釋咩係天九，就此作罷。

某位莫姓住山頂的「金融才俊」，老婆經常哂手袋及做瑜伽，莫姓「金融才俊」的頭銜來源非常特別，他的專業本領是幫人借錢，即做扯皮條。由於他的專業本領可借到錢，因此他自己也下海借埋一份。不過做借錢扯皮條這種收入很難歸還本利和，欠債不還的下場就是滿城街招，早前還被內地公安懸紅500元通緝。

曾經有位上市公司CEO追求當時一曲越咩越愛的吳姓女星，點知由接送至餐廳食飯全程都被人影足。事後有朋友話，其實成件事都係吳姓女星報料畀傳媒，一來意思是該CEO無資格溝我，二來是告訴給所有問價者，如果你條件唔係好過佢，就唔好埋身啦。

近年賭廳大亨溝到不少美女，其中一位混血兒分手後還獲得酒莊。有位經常被稱為「乜乜華頭馬」的邦邦，現在已改名。邦邦口味非常喜歡身材火辣的嫩模，前排有朋友遇到邦邦同一位杜汶澤拖糧事件女主角吃廚師發辦，女主角有一幅非常爆的相，就是著住車厘龜背心，上圍十分澎湃。

友人一路吃廚師發辦，一路斜視，女主角前方有一杯清酒，友人碎碎唸說真係好想佢拎開杯清酒。