錢債不償有何新橋？｜刁佬

最近多間內房輪流出現資金鏈及違約問題，傳統上一係再發債融資，或是配股引入新資金，未算財困嚴重的企業，仍可循這兩途徑出發，總有勇士願意冒險。不過已身陷囹圄的企業，債又無人要，股又無人要，有咩奇招呢。

債券死期臨近，又或是已過期，好似細個欠交功課，唯有拖得就拖，拖到老師唔記得咗，同學簿都改埋，或者已升班畢業放暑假，到時已無人再理。內房企業現在流行為債券訂立「交換要約」，名字很好聽，但實際係推出新債券，而票面利率與現有債券只不過係一樣或者稍高，不換便違約，換了等於把現有債券延期，債主無計可施，大多欣然接受。

除咗「拖字訣」，以資產代債都係常用方式。刁佬有一對藏獒，經常引起好多美女關注，每次大家問起藏獒的由來，刁佬真係得啖笑。當年刁佬做完單刁，對家無錢畀，於事就送了當時價值高達100萬一對的藏獒畀我，多年來呢對藏獒受盡刁佬溺愛，又食又住，如今一隻已仙逝。

租金肉償，刁佬以為得鳳姐先係咁，原來上市公司都會租金股償，包租公冠君產業信託(2778)與租戶醫思醫療(2138)於2020年訂立協議，發行新股市值約3,400萬，以股代租。當時每股發行價4.2元，如今醫思醫療已超過12元，設計神刁的冠君CEO王家琦為集團化解租金問題之餘，仲大賺三倍，同時紓緩了醫思醫療的資金壓力，真係一名長袖善舞的刁后。及後王家琦被醫思醫療禮聘過檔做CEO，現在日日見分析員唱大戲，搵收購合併項目。

債台高築下，蝕讓項目經常出現，本來雄心壯志的中國奧園(3883)，幾經辛苦收購西半山羅便臣道63號、65號、65A號、67號燕貽大廈多個單位及車位，強拍再統一業權。羅便臣道豪宅林立，項目獲批重建成一幢樓高30層的分層住宅，眼看如此貴重的項目終於可開展，卻不幸資金鏈斷裂，識貨的大鱷當然不會要你山旮旯的項目，一舉劍指最精華的西半山項目。原本項目預計落成可價值22億元人民幣，如今卻以9億元蝕1.8億拱手讓予本地資深投資者伍登輝。

既然內房現在債台高築，自救加上神刁大俠各路英雄獻計，必然創意百出。中國恒大(3333)的以房抵債，雖然被各地政策以監管理由拒絕，但是向恒大銷售瓷磚產品的帝歐家居，卻願意接受抵房解決方案，拿返渣沙都總好過渣都無。

刁佬工作室

** 博客文章文責自負,不代表本公司立場 **

上回《金融才俊與罅星》引來好多讀者迴響，刁佬決定再添食。好多時大家在媒體上見到的金融才俊，我們發現都是與「市場活躍人士」經常掛勾。一般來說有錢的老闆越低調，有錢的老闆會請無錢的人去做「炒鬼」，自己躲於幕後。

在香港維持市場秩序，藉著進行市場活動來干預股票的實際供求、價格或交投量，是法治之外的活動，證監會是不允許，不過高風險高回報，重賞之下必有勇夫。總有「炒鬼」，不不不，「金融才俊」以身犯險。以身犯險的事做得一次，無被人拉係好彩，不過做得多始終「獵犬終須山上喪，將軍難免陣前亡。」

因此當「金融才俊」賺到大錢後，都想金盆洗手，不再做「金融才俊」，過返啲安落日子。如果繼續做「金融才俊」，多數都係未上到岸，才會繼續做「炒鬼」，一係就喜歡做賊。

無錢的「炒鬼」為左氹人落疊，揸拉利戴撈刷存在感，過住夢幻般的生活。因為Sam Hui，即係心虛，「金融才俊」一定著到身光頸靚，同保險經紀一樣，經營一個外表好掂的景象。如果管錢管得掂，都管自己錢啦，仲點會係條街度吸金？撈得掂的基金經理，多數都係爛身爛世，「大隱隱於市」。如果佢自己都撈唔掂，你畀錢佢管難道會掂？

其實呢樣嘢亦好弔詭，如果做保險經紀做得好掂而身光頸靚，即係佣金收得多，羊毛出自羊身上，作為身光頸靚的保險經紀客戶，難道會好掂？經典的財經書《客户的遊艇在哪裏》（Where Are the Customers' Yachts）亦曾說過一個經典故事：一個鄉下佬去到紐約金融區，見到遊艇全部都插住投資大行及基金公司的旗幟，鄉下佬天真地問：「投資大行及基金公司都這麼有錢，那麼他們客戶的遊艇在哪裡？」導遊搔搔頭：「客户的遊艇？客戶無遊艇。」

刁佬曾經見過唔少「炒鬼」，剛賺到一筆錢就走去供拉利，結果架拉利剛揸左一年，就斷供，被人拖走。因此刁佬經常都話，金融呢一行做得耐同做得長，比一下子賺得多重要。