公司火燭想起往事 經營之神黎智英媽我唔睇廠 乜係我負責印刷廠咩？

年廿八，七點多，正正在家裡洗身室，用沙田柚葉，挷住花灑頭，清洗自己的臭皮囊，努力清潔，將全年平日洗不清的邋遢，及衰霉氣，一洗而去。

突然間室外手機，响個不停，咁鬼凍，當然不理不聽電話喇。好彩年尾，港交所新春假期停市前，佔我所有股票存倉，投資超過一半的匯豐銀行，突然好似吃咗西藥偉哥，及中藥多元，為我在牛年，一洗頹風，逆轉勝利，一枝箭標上五十多元，賺回他奶奶輸了的銀兩，所以這個年廿八，我洗邋遢洗得特別乾淨，特別舒服，特別開心，匯豐銀行，幫我將全身霉氣，洗走牛年衰運。

繼而抹好我的老肉身，擦上全身凡士林，順筆寫多句，幾十年用了無數名牌潤膚乳，其實最好是，平靚正的凡士林潤膚膏，連大便不暢都得，查小小在肛門，舒服通便啊。如果嚴重便秘，可以用一碗有機純乳酪加一匙羹有機蜜糖、就解決大便的便秘，但是要食飽飯才服乳酪呀，不會傷胃嘅。我曾用此方法，幫助過未期肝癌病人，死前日子，舒服一段時間，才返天家啊。接住穿好睡衣，再用老報人蔣雲，代理的金花茶子油加小小凡士林，慢慢按摩我的老俊臉，因為味道可蓋過凡士林，又不會太油膩。

步出廁所，才打開手機，看手機響了這麼久，什麼人找我。見公司運作總監高佬，咁夜搵我，打回電話問高佬，什麼事呀咁夜? 他說: 「老闆，公司火燭呀，爆炸啊。」驚魂過後，我問有冇同事受傷呀，有冇同事有事呀? 他說「六點多同事正放工，聽見門口充滿電池爆炸，見到大火，她們從後門走甩報警呀。」聽到同事沒受傷，心稍為定神，再問高佬，其他樓層，有冇人受傷有事喎，他說「唔知道呀老闆。」即時火滾，你在不在現場呀，你睇睇，有沒有救護車，有冇人枱上救護車就知喇，我而家即刻返公司。

門口爆炸的電池。

趕緊回公司，衣服不換，穿著家中睡衣，急忙開著架07老積架，高速去葵涌。開到公司附近，遠遠已經見到，長長汽車長龍，朝着公司方向塞車，我即時靠左，將老積架泊喺附近横街，急速步行返寫字樓，還有幾條街，未見公司大廈踪影，戴住N95口罩，已經聞到，帶有燒焦電線塑膠化學嗆喉難聞氣味，轉到梨木道，已見警察叔叔，封了和宜合道。同警察哥哥講，我是火燭公司負責人，才給我通過封鎖區。行到我們公司旁邊工廠大廈，前港姐老公的鄔友正先生的香港名牌，七海海馬牌床褥公司門口，就見到消防大佬，忙着噴水滅火，我在現場員工，走近我身旁，我就問，「有沒有大廈其他人及寵物受傷有事呀? 」平日最大聲浪的靚女，就大聲講，「沒有呀，我們一路走，一路大大聲叫，火燭呀，走走走難喇，所以全幢大廈人與動物生靈，全部安全撤退。」我再問點解會爆炸㗎，答話「我們公司詢問處，大雜工楊生，收工前就負責每日將充滿電嘅電池，拉出大門口，每晚運作同事，將電池帶出去各區，給分發報紙集散地，作為照明及綑綁報紙雜誌的打帶機用，怎知電池無端端爆炸，引發大火呀。老闆呀阿sir周圍搵你喎。」「搵我做咩呀? 」「唔知喎。」我話「咁我這分鐘，就唔做老闆哪，呢分鐘，你代表我做老闆，問警員伯伯什麼事囉，所有同事回家，公司交給消防哥哥，警員先生啦。所有同事，各自返屋企，太濃太多毒氣，唔好再喺度逗留啦，如果今晚不用返工嘅你，鍾意留喺度，我都奈你唔何，但我唔夠10秒，會轉彎返屋企啦。」

個鐘都燒溶咗，停在火燭時的6點9。

年初廿九，早上八點鐘未夠，揸住個豬仔包，一路咬一路開車，返到公司，帶咗四個口罩，衝上燒焦燻黑公司，小心奕奕，在滿地污水，燒到溶溶爛爛，遍佈爛玻璃破碎雜物，行近視窗，將未破碎的窗，全部打開，希望新鮮空氣，可以帶走有毒氣體。接住我又以極快速度，逃離火災現場。跑到對面公園，除下的口罩，已經帶有黑印，每個口罩，都留有濃烈燒焦氣味。等了不久，匯龍建築工程公司楊老闆，到了現場地下，我要求他們即時開工，先解決三大項目，1，接回電源，看電腦伺服器，有沒有受傷。2，看印單據機，可不可以動用。3，開動5部電腦。我公司送報紙同仁進場，今天清理現場，明天楊老闆進場，年初二我寫字樓復工，全靠您呀楊老闆。全靠公司送貨同仁，不顧難聞有毒氣味，清理污垢，滿地破碎現場。又多得裝修公司楊老闆，不理農曆新年大日子，號召各兄弟到場，即時駁電駁電腦駁印單機，令勤力得準時送報紙。免於我們公司，失職於出版公司，有關門之危險。更多謝寫字樓同仁，帶住防毒面具，重新做過，送報紙單據。更要多謝電訊盈科，一個電話，即時派出工程師，幫我們駁通寬頻，令我們與出版的聯網，恢復正常。

公司燒到燶哂。

關於發行工作焦點，就直得講番，與當年號稱經營之神黎智英往事。以前蘋果日報，初初出版，委託周融先生的出版之友公司印刷。當時因為蘋果日報，負責監控品質人員，常因為印刷質素，與出版之友的印刷工友爭拗，我就需要調停，再加上屯門公路，發生泥石流，引致封了屯門公路，所以我近三個月，每晚都在印刷公司，作出調停，及調動發行報紙的安排。當印刷上了軌道，屯門公路又弄好重開，我就將工作焦點，轉返發行焦點，走出街頭，巡查報檔連鎖店銷售點。但是蘋果日報黎智英老闆，竟然在每日極高層十幾人例會，大大聲斥責我，話我偷懶，不入印刷廠工作。我即時反應話，「我解決了印刷問題，解決屯門公路封路問題，上了軌道，我的戰場焦點，就重回街外的發行銷售點，不在印刷廠。再者，印刷機壞，我在印刷廠現場，我都不識修理喎，我沒有作用喎。」黎智英老闆，即時無語望住我。

與黎老闆開完會，我當年就想，人人稱黎老闆，為經營之神，竟然會聽擦鞋仔老點，以為我不去印刷廠無做嘢。今天黎生升為民主之神，不知又受何人何國老點呀。蘋果日報初初出版，我連續兩個多月都喺印刷廠返工，放工就巡發行與銷售點，回家沖完涼，又要返自己公司，每天睡不到二小時，當年不死，真是多謝祖先啊。印刷上了軌道，轉回正常航道，轉返自己工作焦點，就俾黎智英兜口兜面問，小強你偷懶喎，黎先生，您老人家，請我做發行㗎，不是管印刷喎，您不知道咩。

小強

** 博客文章文責自負,不代表本公司立場 **

上一世紀，香港不斷生仔嘅年代，為了控制生育，港英政府搞了個家庭計劃指導會，做了位宣傳人物，叫做得哥，鼓勵香港人做得哥，生了二個後，得哥快快去紮輸精管，不要再生，否則生4個斷擔挑，又會生壞老婆肚，繼而老婆，全身鬆弛。冇了吸引力呀。當時我老友，香港名傳媒人，就响應號召，第一時間，紮好輸精管，逢人都介紹，做得哥好得㗎。

講到得哥，諗起最近有位香港賣蟲商人，亦好似叫得哥，同位中年女明星，拍咗拖一年，點知嗰位女明星，突然間宣佈，唔再同得哥玩拍拖，就算有機會同場，或者不約而同，偶然碰面，。也不再影相，不再同場遊戲，不再同吹水哪。大明星講到咁絕情，但是得哥真是利害，竟然諾諾大方，繼續話我愛她，我會保護她，我會低調為愛她。

這两位名人情侶，各自各宣言，過了沒幾天。傳話的大台大姐大，只是講了幾句無聊話語，得哥就遷怒香港大台，即時宣佈，抽大台過千萬元的賣蟲廣告，重話我得哥，不是好好虾喎。

我作為生意人，即時搲頭想，咩賣廣告，不是看效果看回報呀，是看下不下到啖氣，看有沒有面子㗎，看有冇女大明星，作伴侶㗎？初初仲大大聲話，佢雖然唔同我拍拖，我會保護佢嘅，我會低調處理。但係轉頭又抽人廣告，大佬你愛大明星，都要愛屋及烏呀，抽廣告喺雙刃劍呀，大家都受傷㗎，又何苦來由呢，中國諺語，恩同再造，厚德載物啊，与你大名互揮影呀。

我以前大老闆黎智英就不同喇，佢搵大明星鍾麗緹，宣傳創刊蘋果日報。 鍾少姐就躺平地上，身上舖滿紅蘋果，拍誘惑台灣人咬蘋果廣告。我稍為反對，黎老闆就親自打電話，用粗口罵我，五代祖先，罵到要將我，五馬分屍，罵到我，揸到的手機裂開，揸到全身都出晒煙呀。這才是真正保護女性喎，你要好好學習黎智英先生的風度。

鍾麗緹拍宣傳台灣蘋果日報創刊的廣告。

小強為幫黎老闆做發行，貼埋過億港幣去台灣，瞓在火車軌，分分鐘給火車碾死，又隨時給當地黑幫，用槍打到似蜂巢死。更給陳水扁派兵，捉拿我發行壹周刊。但黎老闆為保護大明星，為了鍾女士，都鬧到我小強出晒煙，鬧到我仆晒街，這才是真正男子漢嘛。想起鍾麗緹，當年傳聞500萬元，拍躺平蘋果日報廣告，我都忘記港元，定是新台幣喇。當時我心想，如果台灣蘋果日報創刊，不搞鍾大明星躺平廣告，改送鍾麗緹全裸海報，就一定買到滿堂紅啦。瞓喺地放滿，全身蘋果，遮晒全身，一條毛都睇不到摸不到，咁靜態電視廣告，幫到銷售就真是奇蹟呢。咁嘅廣告，點樣賣到報紙呀。所以我就同堅哥講，死梗喎，點知給民主皇帝黎老闆，打電話，鬧咗我，成個鐘頭呀。

今日因為寫開得哥拍拖風流韻事，又想起已故賭王何鴻燊，賭王有四位太太，他曾勉勵香港人，學他愛情故事，愛情可以多，但是要風流，絕不可以下流，我今日講德仔與得哥共勉之。想返舊日往事，真有白頭宮女，說天寶遺事的感覺呀。想想吓又想到90年代尾，當年當時有位，電影電視編劇老友，約我吃飯，坐下不久，菜都還沒端上，就問我，有沒有興趣，搵位女明星拍拖。剛剛有位，一線女明星，等錢用，條件40萬陪我拍拖兩個月。我即時講，我哋啲報紙仔，淩晨街頭開工沒廁所，習慣咗週街屙尿屙屎，黐埋女明星度，惹來狗仔隊，容乜易，巷裡踎低屙屎，畀啲狗仔隊，影到我嚿屎呀。到時大家做傳媒，都冇面畀喎，做咗封面故事，給傳媒改名，叫「巷仔屙屎強」，就笑勻全宇宙喇。最慘上法庭，留下週街屙屎案底，全球國家，都不給我入境旅遊呀，怕我污染她們美麗國家啊。我咁喜歡旅遊自由行，都喺咪搞我喇。