「身邊人」話慧玲事件搞唔起

李慧玲炒魷事件爆了一段日子，李小姐講起一個神秘的CY「身邊人」。我們不妨拾人牙慧，又搵吓一個CY「身邊人」，睇睇事件的未來發展，CY「身邊人」認為，李小姐事件搞唔起。

呢個CY身邊人分析，搞唔起的原因有三。李小姐講出好多被炒原因，例如商台在續牌前跪低、CY「身邊人」曾「提醒」佢要「小心份工」云云。但未見李小姐拿出具體證據。無憑無據，件事好難吹到大。

第二個原因係毓民踢爆。市民之所以同李姐打抱不平，主要係源於大家都係打工仔心態，睇住李小姐在記者會上講，商台話炒就炒，李小姐即時要走人，連返公司執嘢以及同事講聲拜拜的機會都無，李小姐因而攞晒打工仔同情分。

但黃毓民日前使出一招李三腳，話李小姐犯了「三大死罪」，所以被炒。致命的一腳係講商台捉到李小姐曾經「密謀跳槽」到鄭大班的數碼電台DBC，連音都錄埋。由無理解僱，變成跳槽不成被炒，商台做老闆唔順夥記咁三心兩意，又唔係全無道理，市民對打工仔愛屋及烏的同情心，即時散咗一半啦。

最後一個原因係商台老闆俞琤在幕後發功。大家雖然未見俞琤露面，但她的反擊力不可以睇少。即使李小姐在記者連番發炮，主要轟志雲大師，但甚少夠膽提及俞琤。

後來才子陶傑在《光明頂》炮轟李小姐不能夠無事實根據就指控商台管理層，又話自己在商台工作十年，從未有感受過李小姐所講的政治壓力。商台其他的節目主持人開腔直指李小姐做人「霸道」，俞琤的影響唔好睇少呀。

「李小姐事件」發展到現在，在上述三大原因影響下，雖然尚未完場，但動力急速減弱，李小姐這兩天也發不出重炮，看來只有餘溫，好難挑起一場政治大火了。

Ariel

** 博客文章文責自負,不代表本公司立場 **

兩間免費電視台牌照出年屆滿，為咗做到聽公眾民意，通訊局搞咗三場公聽會，第一場尋晚舉行咗。

呢啲公聽會總會吸引到正反雙方參與，有人話亞視係咁重播節目，無綫又無新意，仲有人話兒童節目，唔應該咁早播添！多多少少亦會有人話支持兩個台，話應該繼續發牌。

呢類諮詢會，台上人可以聽到幾多意見一時三刻好難分析，但就難為晒前線員工。

先講吓個主持，有無覺得佢熟口熟面？睇真，佢咪就係以前成日喺電視見到，有線前主播王沛然囉！佢而家喺通訊局工作，係牌照管理組高級廣播事務主任。

坐主播台咁耐，做過咁多直播，主持公聽會應該難佢唔到。但呢啲場面往往「順得哥情失嫂意」，結果去到後尾有人覺得唔公平嘈起黎，最難為邊個？王沛然只係指指點點，通訊局高層、電視台代表坐晒喺台上，結果咪又係令企喺台下面的通訊局職員「食死貓」囉！

場內唔少工作人員，除咗維持秩序，仲要負責「遞咪」。邊個手上有咪，就有權講嘢，人人都想搶到手啦！唔輪到我，我咪搶囉！又或者大聲過你，務求要「發聲」！結果有啲攞唔到咪的市民，就遷怒於呢班工作人員，散場時慘成為攻擊「目標」，慘變人家的「出氣袋」。

睇返尋日坐喺台上面，一字排開十幾人，除左通訊局成員、兩台代表，仲有總監、副總監、秘書等人，台下又有一班官員坐喺度。

面對呢啲大場面，通訊局係咪應該安排資深職員，愈係高官厚祿的係咪可以考慮吓身先士卒，親身負責「招呼」呢啲熱情的市民，咁樣前線的員工個心都可能舒服啲。

以前成日話打政府工好，但面對而家咁政治化的環境，咩都有人嘈，又成日俾人指住嚟鬧，政府工都冇以前咁筍喇。