新春團拜，除了不停的食，還有不停的聽長輩朋友重覆又重覆的想當年。今年卻多了一個話題：「唔好搞嘢！」
有一個七十幾八十歲的長輩朋友話：「想唔到當年我叫個仔入咗中文大學，唔好搞嘢，幾十年後，輪到叫個孫唔好搞嘢！」
起初以為他是講男歡女愛，於是我開玩笑的問老人家大仔阿強：「讀書時有冇曳曳搞嘢！」他沒好氣說：「幾十歲人仲講呢D！搞！梗有搞，哈哈，不過是搞社會服務團。」
原來老人家口中的「搞嘢」是指學運等等。七十年代中段，中文大學成立十年，正值內地搞緊文革，校內有很多認識祖國的活動。阿強的爸爸原籍廣東，四十年代尾離鄉別井到香港搵食。上一輩人能溫飽已經滿足，對政治並不熱衷，他又經歷過香港六七暴動，留鄉親人在文化大革命中被批鬥，所以我非常理解他千叮萬囑兒子不要参加活動。
阿強是大仔，父母等着他出身，幫手養弟弟妹妹。他細細個已經幫忙母親穿膠花、做家務，一升高中就補習幫補家計，父母渴望兒子做「寫字樓」工，薪高糧準，他自己又何嘗不是立志脫貧。
阿強說：「我住過板間房，食飯、瞓覺、做功課都得張床，捱過窮。讀大學搞活動是很好的鍛鍊，自己又是草根階層，所以當年專注於服務臨時房屋區（未上到公屋前的中轉屋），希望幫到比自己更窮的小朋友。」又説：「激進的，我唔會參加，你知喇，沙塵滾滾，會殺錯良民，俾差人拉咗，阿爸冇錢幫我打官司。仲有激情過後，還要生活，要養家，有案㡳將來搵工好麻煩。」他目光望向他的兒子⋯⋯
老人家一副老懷安慰的模樣，他說：「係呀！我自細教仔女，人多的地方莫企！」阿強目光再望向他的兒子⋯⋯
阿強見兒子無出聲，再講：「睇電視知道旺角出事，我第一時間打俾個仔，知道佢留在宿舍，我先至瞓得著。唉，那些支持暴動的政黨大佬，走去義助涉案者，唔知佢地自己的仔女，有冇在旺角前線？叫人地的仔女上陣.....」
我心諗：「可憐天下父母心」，又怕新年流流觸發家庭藍、綠、黃爭論，即轉話題：「唉呀！唔記得派利是！」「利利是是，祝你學業進步！心想事成！早日找到女神！」
黃毅力
** 博客文章文責自負,不代表本公司立場 **