政事
蘋果動新聞今日推咗個Push，老細黎智英(肥佬黎)拍片撐立法會新界東補選候選人、公民黨的楊岳橋，話支持佢當選。
有政府AO私下講，咁樣使唔使計選舉經費？
政壇口痕友回應話，以前都發生過，在選舉期間，有人在報章上失驚無神登全版廣告，話支持某候選人。當時都引起過討論，咁計唔計落有關候選人的選舉經費呢？當時的官方理解話，無論是否得到當事人同意，在報上出現撐候選人的廣告，都有機會計入選舉經費。所以之後各級選舉的候選人都好小心，免被無厘頭支持者「害」親，加埋呢筆就爆數。
傳統宣傳手法就在報紙登廣告，依家進入互聯網年代，網媒更加無遠弗屆，在互聯網登廣告就係新手法啦。蘋果動新聞威力咁強大，按佢自己條數，每日有200萬獨立瀏覽者，在市場上收一個廣告都唔平啦，咁肥佬拍條片支持一個候選人，放在自己的網媒上做大，究竟係新聞還是廣告呢？若然等同在報上賣廣告，再加肥佬黎咁重量級代言人，成個廣告市值幾多錢呢？
如果被判定為選舉廣告，分分令到2、300萬的選舉經費上限爆晒額喎！
新界東其他候選人包括梁天琦、周浩鼎、方國珊、黃成智、梁思豪、 劉志成。
小鯊
** 博客文章文責自負,不代表本公司立場 **
今日打開《蘋果日報》一睇，見到《蘋果》社長葉一堅「堅哥」的專欄，心諗堅哥個專欄唔係逢星期一出嘅咩？突然出專欄係唔係有料爆？
堅哥篇文章題為「別人囝仔死不完？」，佢話旺角之亂時半夜醒來，第一時間搵仔，知道他們冇喺旺角才放心。
堅哥話：「你鼓勵及表揚武力抗爭時，最好你及仔女都在前線，最好帶埋你老婆你老母你阿爺。否則我會說：嘩，你好聰明，因為精人出口，笨人出手。至叻係你。」
堅哥繼續針對「你話以武力抗爭讓梁振英下台及爭取真普選」之說，話：「但叫年輕人在旺角，把警察打得頭破血流便可以？叫年輕人在暗角，被警察打得死去活來便可以？讓社會充滿仇恨便可以？讓別人的孩子去死便可以？唔信！」
《蘋果》中人話，堅哥提早出文，是針對李怡的文章，李怡早兩日在《蘋果》發文，題為「永遠站在反抗者一方 」。李怡話「絕不應該對體制暴力和反抗者暴力各打五十板。反抗者的磚頭暴力，相對於中共港共的體制暴力，反抗者無疑是以卵擊石。但正如村上春樹所說，不管高牆多麼正確，雞蛋多麼錯誤，我們都永遠要站在雞蛋一方。」
過去李怡為《蘋果》寫社論，言論傾向支持本土派。自本周起（暴動之前）《蘋果》已經將他調往「李八方」版，顯示不想外界將他的言論和《蘋果》立場等同。如今堅哥突然出文，文內多處指向「你」，意有所指。公司內部傳聞話堅哥的文章不只是堅哥自己的意見，有老細肥佬黎的影子咁話。
