霸戲哥之日常#069 │ 慰史密妻

奧斯卡頒獎禮落幕，全球瘋傳Will Smith掌摑Chris Rock條片，勢必成為最潮meme。除咗呢件咁突發事件，成個頒獎禮嘅賽果同運作都算正路，埋單結算霸戲哥估六中三，燈死率50%，算係咁啦。

《Dune》無懸念立晒啲技術獎（最佳音效、最佳視覺效果、最佳攝影、最佳剪接。最佳佈景設計同最佳原創配樂），咁都冇最佳電影，大家就知套戲咩料（笑）。我慶幸《CODA》臨尾反cup《The Power of thd Dog》拎最佳電影，但戥大輸家@netflixhongkong唔抵。

演員方面，Ariana DeBose同Jessica Chastain都係大熱當選最佳女配、女主，霸戲哥扒冷點都要付出代價。最失落係Benedict Cumberbatch輸畀Will Smith，睇嚟角色難度分係唔計嘅。再者，年年幾乎都係人物傳記片拎影帝影后，咁不如以後搞奧斯卡模仿大賽啦。

不過，史密夫喺頒獎禮嘅表現點都要讚，史密妻Jada Pinkett當眾被Chris Rock笑甩頭髮，換轉其他人，未必克制到情緒，淨係升一巴咁少。冷靜過後，韋史密夫上台致辭時仲識得講話係保衢家人先會失儀，真係gentlement典範。

不過，聽聞佢呢個舉動有手尾根。Oscars研究緊會唔會褫奪Will Smith個影帝銜頭。咦，如果係堅，會唔會頒番畀Benedict呢？

霸戲哥

** 博客文章文責自負,不代表本公司立場 **

有日豬視妹失驚無神同我講，話MIRROR某位成員入圍全球百大型男，我當堂嚇有跳，然後得啖笑。型？邊鬼度型呀？

名我唔會開架啦，無謂引發世界大戰，只係覺得個選舉係咪咁流呀。跟住轉個頭，成隊MIRROR同ERROR都入圍。而最近入圍嗰個，係黃偉文。

呢個「全球百大型男2022」選舉，根據TC Candler公佈嘅「遊戲」規則，主要有兩個方法提名，一就係喺YouTube或IG提名，但唔寫包單入圍。二就係課金，只要每月科水，就保證成功提名，連續科夠半年，仲可以有提票權添。終於真相大白。

至於被提名嘅Ｗyman，唔夠一日就自行宣佈退選，其實真係型喎。呢件事令霸戲哥諗起《初戀無限TOUCH》，係Ｗyman極罕有感情戲份嘅戲。戲入面Ｗyman不知幾有男子氣概，仲奪得陳彥行芳心添。你喇沙？我喇沙。

Ｗyman入圍全球百大型男，至少我服喎。