博客文章
TVB早前宣佈封城，由曾志偉身先士卒拎埋睡袋喺電視城紮營，聯同一班藝員連續三星期不眠不休拍攝一連串節目，無非都係想帶畀香港人歡樂同正能量，係抵讚嘅。
繼之前播出玩「真的假不了」嘅《講你都唔信》，聽晚8點半又有新遊戲節目《The Show Must Go On》登場。
節目由錢嘉樂同馮盈盈主持，玩法都係例牌分成兩隊玩遊戲，贏嗰隊有獎品咁。首集打頭炮有正義之Bob率領嘅「大玩特玩」隊（翟威廉、周志康、楊潮凱、林秀怡、陳嘉桓、黃美棋），另一隊就由陸浩明嘅「後生仔傾吓偈」隊（孔德賢、鄭衍峰、黃婧靈、杜穎珊、徐文浩、黃紫恩），睇牌面似乎後生仔醒目啲噃。
至於玩嘅遊戲，睇宣傳片就知都係玩啲大學old camp嘢，人肉坦克車呀、打樁機呀、口傳乒乓波之類，好明顯係打後生仔嘅市場。
眼見一班藝員嘻嘻哈哈上下一心，霸戲哥都覺得幾安慰。希望疫情都好似節目一樣，眨吓眼就過啦。
霸戲哥
** 博客文章文責自負,不代表本公司立場 **
以搞「全球百大型男美女」選舉聞名嘅TC Candler，近日又公佈新一輪入圍名單，TVB兩位當紅靚女入圍，分別係@aliaime Ali李佳芯，同國民初戀@chantelyiu Chantel姚焯菲。亦即繼MIRROR、ERROR同Wyman後，又有港星入圍（笑）。
講起呢啲乜乜百大俊男美女選舉，其實一直都有，不過霸戲哥讀書年代，總覺得公信力高好多，譬如史上最靚金庸影視角色，翁美玲嘅黃蓉同陳玉蓮嘅小龍女永遠都係Top 10。起碼唔會好似依家咁花多眼亂，入圍門檻又咁低。
Ali同Chantel梗係稱得上靚女啦，唔知After Class其他幾位成員炎明炎明熹、詹天文同鍾柔美又幾時上榜呢？COLLAR仲有8位成員添，TC Candler今次真係肥仔啦。
扯遠少少，大家仲記唔記得2017年港姐冠軍雷莊兜？已經返咗加拿大生活嘅佢，最近又參加咗「Miss Face of Humanity 2022」選美比賽，仲係代表香港出戰架，佢將會同另外27位來自世界各地嘅佳麗對戰，聽日香港時間朝早7點半就有結果。
嗯，呢個選舉似乎公信力高啲。
