《香港晨報》近期四處招兵買馬，此前坊間一直傳會請400人，《晨報》負責人郭慶榕日前同傳媒澄清，唔係請400人咁少，係1000人至真。聽完之後的第一個感覺，只有一個字：「勁」。
早前巴士的報幫《晨報》計數，無10億元無得玩。睇完郭慶榕一番講解，條數隨時去到20億。本來計算晨報請400人，人工每月平均大約25000元，一年工資就要1.2億萬，依家請1000人，一年人工就要3億，加埋印刷成本4.4億，一年的基本開支就要7.4億，比原先想象的仲要貴。
晨報可以賣到幾多報紙、收到幾多廣告?唔知，但咁玩法，一年蝕個5億、6億，絕不為奇。更「勁」係《晨報》仲話要起自己的印刷廠，依家起印刷廠，認真唔平，冇10億元落唔到樓。所以話，佢地如果冇20億在手，真係玩唔到兩年。
千祈唔好以為我地督大數，聽聞有人好大口氣，四處同人講《晨報》有大把水，無有怕，預咗一年燒6億咁話。不過，郭慶榕至今都未有透露資金從何而來？話時話，唔知邊個有錢人可以疊水成咁，可以10幾、20億出來玩呢個遊戲呢？
Ariel
** 博客文章文責自負,不代表本公司立場 **
分流過海隧道交通流量的「紅加東減」方案，突然胎死腹中，引起唔少批評，錢又駛咗，又用咗幾年嚟研究，最後得個桔，都唔知怪得邊個好。
「紅加東減」計劃原定六月試行，政府原來已同東隧公司開過多次會，傾吓執行細節同方法，尤其係因為東隧要減價「吸客」，即使多咗車流都隨時得不償失，政府要按實際車流量，將而家隧道費同第日下調咗嘅隧道費之間嘅差額，補貼返俾東隧。
據講政府同東隧公司早前密密開會，好多細節都傾好晒，就連具體補貼方法咁技術性嘅內容，都已經傾到。
點知臨門一腳，政府喺兩、三個月前突然話觀塘區議會鬧到反艇，之後突然無疾而終。
究竟當中發生咩事呢？官方版本係「紅加東減」後車流量大增，區內頂唔順，但實情可能唔止牌面理由。
據我哋觀察，東隧近幾年車流多咗，早晚返工放工時間都會有少少塞，平均要塞成十五分鐘。大家都知啦，區議員大部份都車出車入，相信都唔會少得用東隧，如果第日「紅加東減」，多咗汽車用東隧，班區議員咪要受塞車之苦囉！佢哋「鬧爆」力阻政府推行，一啲都唔出奇。
不願承受塞車之苦係人之常情，之但係使咗七百萬研究費，納稅人又可以向邊個追究呢？！
