區佬怕塞車玩殘「紅加東減」

分流過海隧道交通流量的「紅加東減」方案，突然胎死腹中，引起唔少批評，錢又駛咗，又用咗幾年嚟研究，最後得個桔，都唔知怪得邊個好。

 

「紅加東減」計劃原定六月試行，政府原來已同東隧公司開過多次會，傾吓執行細節同方法，尤其係因為東隧要減價「吸客」，即使多咗車流都隨時得不償失，政府要按實際車流量，將而家隧道費同第日下調咗嘅隧道費之間嘅差額，補貼返俾東隧。

 

據講政府同東隧公司早前密密開會，好多細節都傾好晒，就連具體補貼方法咁技術性嘅內容，都已經傾到。

 

點知臨門一腳，政府喺兩、三個月前突然話觀塘區議會鬧到反艇，之後突然無疾而終。

 

究竟當中發生咩事呢？官方版本係「紅加東減」後車流量大增，區內頂唔順，但實情可能唔止牌面理由。

 

據我哋觀察，東隧近幾年車流多咗，早晚返工放工時間都會有少少塞，平均要塞成十五分鐘。大家都知啦，區議員大部份都車出車入，相信都唔會少得用東隧，如果第日「紅加東減」，多咗汽車用東隧，班區議員咪要受塞車之苦囉！佢哋「鬧爆」力阻政府推行，一啲都唔出奇。

 

不願承受塞車之苦係人之常情，之但係使咗七百萬研究費，納稅人又可以向邊個追究呢？！

Ariel

** 博客文章文責自負,不代表本公司立場 **

過完春節，內地官場如過山車般刺激，本來仲傳緊高層打老虎遇阻力，外號油老虎的前政治局常委周永康可能軟著陸㖭，呢頭啲社交網圈子未傳完呢類流言，果頭再有一名油老虎的貼身舊部即中箭，海南省副省長冀文林，涉嚴重違紀違法被正式調查。

 

呢位只有47歲的明日之星墮馬，受到媒體同公眾關注，當然係因為佢同周永康的十年「主僕情」，拉得佢，都劍指油老虎架喇，但呢件事引起內地官場熱議啲，係另一個原因，事關隨著油老虎身邊一個個秘書舊部被正式調查，冀文林都被傳過一度受查，後來出番嚟照過佢的官場生涯，外界以為佢可以過骨，點知會峰迴路轉。

 

聞說舊年十二月到今年一月，冀文林有廿幾日唔見咗人，據報佢被召返北京開會，幾日後返到海南，之後仲有幾次被問話添。但上月冀文林又再次出現返喺大眾面前，出席海南省政府全體會議，春節前後仲慰問海口市的清潔工人，外界一度以為佢「雨過天晴」架。

 

世事難測，諗起佢去年過年(2013年春節)時慰問過啲清潔工人，笑晒口，同啲工人有傾有講架，仲大派利是果開心樣，以為佢來年又可以開心派番利是，繼續做佢的大官。

 

 

所以有時啲嘢真係講唔埋，唔好咁「老定」，被人查完一大輪，放返出來以為無事，仲風騷周圍派利是、social，唔好以為就一定過到關呀！

 

有時跟老細同泊碼頭一樣，好似冀文林仕途好似「坐火箭」。2002年，佢仲係一名正處級秘書，但十年後已經位居副省長，好多人恨都恨唔到。

 

內地官場對高層秘書，有個外號叫「二號首長」，既是領導的心腹，更是佢地嘅「筆桿子」，被視為前途無限咁話。不過，呢啲嘢真係恨唔嚟，要睇吓你好唔好命水，跟著個咩老細！不過世界輪流轉，首長有權有勢你就風光，一旦首長被查失勢，亦難逃劫數。

 

所以有人話，油老虎的「四大秘書」真係「成也周永康，敗也周永康」啦！