過完春節，內地官場如過山車般刺激，本來仲傳緊高層打老虎遇阻力，外號油老虎的前政治局常委周永康可能軟著陸㖭，呢頭啲社交網圈子未傳完呢類流言，果頭再有一名油老虎的貼身舊部即中箭，海南省副省長冀文林，涉嚴重違紀違法被正式調查。
呢位只有47歲的明日之星墮馬，受到媒體同公眾關注，當然係因為佢同周永康的十年「主僕情」，拉得佢，都劍指油老虎架喇，但呢件事引起內地官場熱議啲，係另一個原因，事關隨著油老虎身邊一個個秘書舊部被正式調查，冀文林都被傳過一度受查，後來出番嚟照過佢的官場生涯，外界以為佢可以過骨，點知會峰迴路轉。
聞說舊年十二月到今年一月，冀文林有廿幾日唔見咗人，據報佢被召返北京開會，幾日後返到海南，之後仲有幾次被問話添。但上月冀文林又再次出現返喺大眾面前，出席海南省政府全體會議，春節前後仲慰問海口市的清潔工人，外界一度以為佢「雨過天晴」架。
世事難測，諗起佢去年過年(2013年春節)時慰問過啲清潔工人，笑晒口，同啲工人有傾有講架，仲大派利是果開心樣，以為佢來年又可以開心派番利是，繼續做佢的大官。
所以有時啲嘢真係講唔埋，唔好咁「老定」，被人查完一大輪，放返出來以為無事，仲風騷周圍派利是、social，唔好以為就一定過到關呀！
有時跟老細同泊碼頭一樣，好似冀文林仕途好似「坐火箭」。2002年，佢仲係一名正處級秘書，但十年後已經位居副省長，好多人恨都恨唔到。
內地官場對高層秘書，有個外號叫「二號首長」，既是領導的心腹，更是佢地嘅「筆桿子」，被視為前途無限咁話。不過，呢啲嘢真係恨唔嚟，要睇吓你好唔好命水，跟著個咩老細！不過世界輪流轉，首長有權有勢你就風光，一旦首長被查失勢，亦難逃劫數。
所以有人話，油老虎的「四大秘書」真係「成也周永康，敗也周永康」啦！
Ariel
** 博客文章文責自負,不代表本公司立場 **
李慧玲炒魷事件爆了一段日子，李小姐講起一個神秘的CY「身邊人」。我們不妨拾人牙慧，又搵吓一個CY「身邊人」，睇睇事件的未來發展，CY「身邊人」認為，李小姐事件搞唔起。
呢個CY身邊人分析，搞唔起的原因有三。李小姐講出好多被炒原因，例如商台在續牌前跪低、CY「身邊人」曾「提醒」佢要「小心份工」云云。但未見李小姐拿出具體證據。無憑無據，件事好難吹到大。
第二個原因係毓民踢爆。市民之所以同李姐打抱不平，主要係源於大家都係打工仔心態，睇住李小姐在記者會上講，商台話炒就炒，李小姐即時要走人，連返公司執嘢以及同事講聲拜拜的機會都無，李小姐因而攞晒打工仔同情分。
但黃毓民日前使出一招李三腳，話李小姐犯了「三大死罪」，所以被炒。致命的一腳係講商台捉到李小姐曾經「密謀跳槽」到鄭大班的數碼電台DBC，連音都錄埋。由無理解僱，變成跳槽不成被炒，商台做老闆唔順夥記咁三心兩意，又唔係全無道理，市民對打工仔愛屋及烏的同情心，即時散咗一半啦。
最後一個原因係商台老闆俞琤在幕後發功。大家雖然未見俞琤露面，但她的反擊力不可以睇少。即使李小姐在記者連番發炮，主要轟志雲大師，但甚少夠膽提及俞琤。
後來才子陶傑在《光明頂》炮轟李小姐不能夠無事實根據就指控商台管理層，又話自己在商台工作十年，從未有感受過李小姐所講的政治壓力。商台其他的節目主持人開腔直指李小姐做人「霸道」，俞琤的影響唔好睇少呀。
「李小姐事件」發展到現在，在上述三大原因影響下，雖然尚未完場，但動力急速減弱，李小姐這兩天也發不出重炮，看來只有餘溫，好難挑起一場政治大火了。
