CY最欣賞的人是董生 最好朋友是太太

特首 CY和屯門保良局道教聯合會圓玄小學的學生個幾鐘的座談，話題不太政治性，但偶爾也涉及政治或一些敏感一點的話題，例如男人最難評價的人︰太太。

CY被小學生問到誰是他最好的朋友及拍擋時馬上答:「太太，她是重要的伴侶，朋友和拍擋，一個家庭要兩夫婦分工合作，呢個拍擋係指家庭方面。我未入政府之前我做測量師，她是律師，我地無業務來住，但家庭方面是好好的拍擋。」

一個特首講誰是最好朋友，都會惹起閒言閒語，但將太太形容成「最好朋友」，又真係估佢唔到喎。

另一個問題是「你最欣賞那一個香港好有貢獻的人？」CY諗都唔諗即答:「董生，董建華先生，因為他作為香港第一任特首，率先落實一國兩制，港人治港，高度自治，好唔容易，為香港發展打好基礎，他是第一任特首，值得大家尊敬。」

Ariel有啲好奇，到底小學生的問題，事前有無俾特首過目，若然之前未睇過，CY答「董生」答得咁爽，董生聽到，都好難唔支持佢喎。

最嚴肅的問題就答得最大路，學生問:「香港最需要改善的地方？」CY答房屋係好大問題，環保、貧窮、老人院舍亦係最需要改善。

Ariel

** 博客文章文責自負,不代表本公司立場 **

特首 CY上星期六和屯門保良局道教聯合會圓玄小學的學生座談，條片今日放出來，有1時24分咁長，睇番小學生問的問題，又真係小學生關心的問題，例如問吓特首童年、鐘意玩乜嘢、食乜嘢、聽乜歌之類。

CY講起小時候難忘回憶，話最記得係孭膠花、穿膠花。佢話爸爸做警察，300幾元月薪，唔夠使費，爸爸年紀大，就快要退休，退休後要搬出政府宿居。媽媽想賺多啲錢，就行去附近的工廠，攞嘢返屋企做，穿膠花，逐件計人工，媽媽一日到黑都在穿膠花。

CY話他上午幫手去買餸，回家洗嘢，幫忙送膠花，他當時小學四五年級，膠花重，孭到兩邊膊頭不平衡，而家都係一邊膊頭闊啲，他去一次送膠花，過程中都要要停兩三次抖一抖。但事後回想，就有成就感，因為通過辛苦得到的結果，都是甜的。

小朋友問佢有無一些事有深刻的啟發? 佢答話好似行山，爬上山，山斜，路又難行，但爬到上去好開心。青少年人唔怕艱難，唔怕挑戰，好有勇氣去做，做到，鼓勵自己，呢啲係正能量。

小學生問佢鐘意聽乜歌? CY答:「我講的歌星你不識，Bee Gee?(無反應) 木匠樂隊?(亦無反應)有一首歌我最喜歡，有40年了，有一套戲《天地一沙鷗》的主題曲， Neil Diamond唱的，套戲講講一隻沙鷗，成套戲拍佢在天上飛。」

 

CY無再講《天地一沙鷗》講乜。其實套戲講一隻叫喬納森的海鷗，他擁有與一般海鷗不同的熱愛飛翔的精神，花大量的時間練習高超的飛翔技藝，但其他沙鷗因為他的特立獨行而驅逐了他。後來有兩隻卓越的海鷗，將他引入新的世界，那裡所有的海鷗都來自愚昧的地球，但都擁有卓爾不凡的、熱愛飛翔的心。在那裡喬納森找到歸屬，日益精進。難道CY借此隱喻︰「誰能明白我」？

當然除咗咁勵志的內容，也有古靈精怪的問題，例如問CY細個是否鐘意食零食？CY答話鐘意食，但無錢買。朱古力一年食一次已好了。有時要在屋企搵沙糖食。至於最鐘意的地道小食，佢提到一種淺啡色甜腸粉。似芝麻卷，長的，而家無哂。

亦有小朋友抽CY後腳，問佢有無按政府廣告咁建議，日日動半小時? 佢好無奈咁話，而家運動愈來愈少，以前有游水，而家都無，無時間日日做運動半個鐘。而家去健身室，但時間唔夠。做政府好多突發的事要處理。