鄉議局內部就組黨一事內哄白熱化,上水鄉事委員會主席侯志強聲言籌組鄉事派政黨「新進步聯盟」,沙田鄉委會主席莫錦貴反對以鄉議局名義組黨,昨日和10個鄉委會代表開記者會表達反對立場,侯志強就去莫錦貴的記者會踩場,與莫對質,揚言組黨與鄉議局無關。
鄉議局主流派顯然反對組黨,鄉議局副主席林偉強昨日原定聯同莫錦貴開記者會,但最後只有莫錦貴和10個鄉委會代表到場,表明鄉議局屬法定諮詢組織,不能組黨。 侯志強帶同自己友十八鄉鄉委會主席梁福元,連同數十人直踩記者會與莫對質。
侯志強形容一到選舉鄉事派本來就四分五裂,「你莫錦貴嘅公民力量、我嘅自由黨;你嘅經民聯、我嘅民建聯…一到選舉,好似老鼠咁各自歸窿,捐晒啲窿度」。
莫錦貴形容一旦組黨成個鄉議局冇咗,指「組個黨有乜所謂咩?有錢有人即刻得!」 事後鄉議局主流派撐莫錦貴,鄉議局主席劉業強發聲明話,鄉議局不具備組黨法理基礎,組黨一事不存在任何討論空間,至於個別鄉議局成員組黨屬其個人意願。
身兼鄉議局副主席的大埔鄉委會主席、民建聯張學明更擔心,「會唔會喺尋求其他建制派支持新界人權益時,會有更大難度呢?」
政壇中人分析,候志強咁搞,未必搞出一個鄉事強大政黨,但首先就令鄉事派分裂,削弱他們在選舉中的影響力。
Ariel
** 博客文章文責自負,不代表本公司立場 **