政事
新聞行政人員協會今晚在美麗華酒店慶祝成立三十周年，有個小插曲有少少搞笑，就係全國政協常委胡定旭送嘅花籃。
花籃上書「賀新聞行政人員協會三十周年」，睇落好正常，下款睇真啲，竟然是「胡定旭敬輓」，只能講句「大吉利是」啦。
胡定旭知道後話非常唔好意思，相信係花店手民之誤，佢對此深感抱歉咁話。大家都知肥胡都唔想，雖然唔老黎，但都唔會怪佢。
Ariel
** 博客文章文責自負,不代表本公司立場 **
新聞行政人員協會(NEA)踏入三十周年，晚上在美麗華酒店舉行晚宴慶祝，新聞界捧場不在話下，政界都非常俾面。
CY出任特首後年年都有出席NEA周年晚會，今年三十周年大慶，自然亦到來，難得係前任特首煲呔曾都一口答應出席，而兩位司長，林鄭月娥同曾俊華都俾面坐足全場，仲一齊做主禮嘉賓，同NEA的執委齊齊唱生日歌同砌蛋糕，呢個場面真係官場未見過啦！
新聞界同政府新聞處交手最多，NEA成立三十周年，亦經歷多位新聞處長的年代，今晚就有現任新聞處長聶德權到來之後，仲有三位前新聞處長出席，包括陳祖澤、邱李賜恩，同埋依家做緊特首辦主任的邱騰華。呢張大合照都好值得珍藏。
現任新聞處長聶德權(左二)、陳祖澤(左四)、邱李賜恩(右二)、邱騰華(右一)。
每年NEA周年晚宴都有特別表演嘉賓，今年無特首唱歌，可能費時再搞出版權風波，只有商務及經濟發展局的蘇錦樑局長自彈自唱不特止，仲自己作埋歌仔來表演，唱咗一首：拉布「錦」言，話要表達自己拉布時的心聲。
一齊聽吓局長有咩嘢心聲：
