兩會在北京召開，阿爺日日出硬嘢，中央港澳工作協調小組組長張德江昨日又發炮，指有人不斷提高港人對普選的期望，是打著打著爭普選的旗號出來攪局，破壞香港穩定，並比喻在市場上，賣假貨的，通常是叫得最大聲的。阿爺此一說，明顯是衝著佔中、衝著泛民而來。
一切由佔中這個運動而起，睇民調佔中不見得有好大市場，近期的民調都只係有25%人支持佔中，反對高達57%(明報截至1月24日民調)，可以話大比數反對。但我和反對佔中的市民傾起，佢地又認為阿爺有啲反應過敏，根本唔覺得佔中咁大件事，點解阿爺要咁高規格回應?
咁啱有北方來客到港收風，問起「過敏」的問題，北方來客道出另一個版本。佢話近期發生的事情，阿爺最關心的是昆明火車站恐襲和烏克蘭事件。
疆獨恐怖份子在昆明火車站導演的襲擊，極其恐怖，他們用大刀見人就斬，老少也不放過，根本就是專門揀昆明這種不設防的旅遊城市施襲，由於只是用刀這種最普通的武器，不是用槍枝彈藥，所以更難防備。近期疆獨的恐怖活動愈趨活躍，所以新疆一早已加強保安，在烏魯木齊出入酒店都要經過金屬探測器，一般民眾覺得十分擾民，怨聲很多。如今回頭看，若新疆不是這種保安水平，當地的襲擊會否更多呢?
如今暴徒將目標移向其他城市，各地唯有加強保安，你現在去北京、上海、廣州的火車站看看，已有荷槍實彈的武警巡邏。防患未然時，難免令人神經緊張，難免擾民，但這些亂局並不是如大家想像中那麼遙遠。
佢又講到烏克蘭，民眾失控上街，政權說倒便倒，烏克蘭總統阿努科維奇是由直選選出，任期明年才到，但去年11月一開始上街，亂局就停不了，也不理在任期中以街頭政治推翻政府，是否違反民主憲政，總之說反便反了。他說香港佔中的問題也是怕一搞便失控，發起運動的佔中三子，根本控制不了局面，擔心就容易演變成不能停止的街頭暴亂，烏克蘭就是這種局面。
阿爺還有更大的擔憂，香港若出現亂局，蔓延到大陸的機會很高，一則香港和廣東省地理上貼近，二則一年有2000多萬大陸旅客來港，香港一亂大陸必亂。聽完阿爺的顧慮，又開始覺得，香港人是否想得太簡單呢?
盧永雄
香港對內地旅客意見日多，中央港澳工作協調小組組長張德江今日話，已指示港澳辦研究香港接待旅客的容量。言下之意係開始要控制來港旅客的增長，香港求仁得仁。
經歷過香港2003年沙士無晒生意之慘，自然對自由行有啲感覺，覺得香港靠佢救番起。不過人往往是善忘的，對已得之物不會珍惜，對短缺之事刻意追求。香港今天生意唔錯，去餐廳酒樓不再是空空如也，而是人頭湧湧，所以我地唔再追求生意，只追求抖氣空間，呢種感覺亦係好正常，你試吓去旺角、尖沙咀、銅鑼灣感受一下地鐵之逼，就知道為何開始愈來愈多人對自由行有意見啦。
不過中央領導人從來都知道自由行係一把兩刃劍，反而香港的官員傻傻地好似唔知。我聽過一個故仔，話2003年仲係董伯伯做特首的年代，香港死死哋，就去搵阿爺攞自由行，希望搵內地旅客救港。
廖暉(資料圖片)
北京月壇南街港澳辦大樓內，在主任廖暉的辦公室中，廖大叔咬住口煙，用純正到唔純正的廣東話:「自由行? 你諗清楚香港食唔食得起喎? 食得起至好攞呀!」所以話大叔真係有先見之明。
上面係真事，下面係我創作，大叔言下之意可能係兩種: 第一係大陸有13億人，放咁多人去會唔會踩沉香港? 又或者第二係我地大陸人無乜文化，隨街踎，你地高貴的香港人頂唔頂得順呀? 唔知大叔的真正意思是什麼，總之他擔心放自由行嚟香港有副作用，叫香港諗清楚至好要。結果大家都知，董伯伯當年急住搵自由行做水泡，可惜到當年7月1日溫總理來港送自由行呢個大禮時，同日有50萬人上街，董伯伯就為他人作嫁衣裳了。
大叔未放自由行都諗到有副作用，香港官身在其中不知衰。舊年訪港旅客已有5000萬，今年1月蘇錦樑個局仲開開心心咁公布一個本港接待旅客能力評估報告，預測到2017年有超過7,000萬旅客訪港，2023年甚至有1億人次的旅客湧港。聞說特首CY見到呢個1億的數字都頭痛，唔知蘇局長為乜要攞出來講。
結論係香港都無能力再食更多自由行架啦，要用吓腦搵吓其他生意啦。
盧永雄
