民主黨加入拒簽確認書 自己玩自己

政府要求立法會參選人簽署確認書，確認擁護《基本法》 中香港屬中國不可分離的部份等反對港獨的條文， 呢個做法明顯係針對鼓吹港獨的激進派，但民主黨班後生仔候選人就加入拒簽確認書。

政壇高人話，選舉唔係請客食飯，係你死我活的鬥爭，由於泛民和建制的票源分開，所以好多時出現建制同建制爭， 泛民同泛民爭的場面。過去很多選舉論壇，激進泛民都係針住公民黨、民主黨候選人去隊， 唔花力去針對建制派。

佢話簽確認書一役，又見到邊個古惑，邊個戇居。在激進派中， 熱血公民港島參選人鄭錦滿雖然支持港獨，但話明會簽署確認書。但傳統泛民陣營中，民主黨林卓廷和許智峰都無簽確認書， 批評確認書「畫蛇添足」。

高人拆局，政府都未開牌，點知會唔會公然表態話不簽確認書不批准參選，唔順就唔該去司法覆核。連本土民主前線梁天琦都話司法覆核贏面細，政府咁玩唔出奇。熱血公民的策略係有理無理簽咗確認書先，你唔可以唔俾我參選。但民主黨班年青人唔簽，到時政府話唔俾選難道又死死地氣去簽呀？

高人話，民主黨後生仔想玩激進，但點激進都唔會支持港獨， 呢壇確認書根本唔係針對佢地，跟人嘈有乜著數？講衰啲若政府真係行硬，唔簽確認書唔俾參選，取消部份激進候選人資格，少了人搞局，民主黨贏面其實就大了。你話如果司徒華華叔仍然在生參選，佢一定係口就鬧，手就簽， 最好你本土派唔簽，少幾個人爭位。點會好似而家咁，自己玩自己。

高人話，特區政府以台灣之鑒，民進黨打正旗號台獨去參選，國民黨總統李登輝因為個心偏向台獨，讓他們去選立委，後來選埋總統，結果成就了「台獨」政治現實。阿爺唔會俾香港行到呢一步，所以先以確認書封殺，也警告個個政黨都俾水支持的商界，唔好支持港獨派。

Ariel

** 博客文章文責自負,不代表本公司立場 **

重建後嘅皇崗口岸喺2026年10月12日正式開通，實施「一地兩檢」同「合作查驗、一次放行」，仲要24小時通關，真係好方便。開通接近一個月，平日日均出入境人次已經超過86,000，比以往落馬洲管制站多咗成倍；去到週末同假期，日均更加直逼140,000人次，受歡迎程度可見一斑。

不過，人潮多咗，交通需求大增，政府就留意到有市民同旅客貪方便，搭咗啲跨境私家車往返兩地，而且當中部分係非法出租或取酬載客嘅「白牌車」。呢啲車無合法嘅出租汽車許可證，做生意屬刑事罪行。為咗保障乘客同道路使用者安全，政府近期已經明確表示高度關注，執法部門亦加強咗打擊，除咗依法檢控違例司機，仲會扣押涉事車輛。運輸署同警方亦都密密做宣傳，除咗於官方網站及社交媒體發放訊息，運輸署亦向封閉道路通行許可證持有人以及指定跨境駕駛計劃批准信持有人發出電郵，直接提醒相關車主唔好以身試法，列明違法嘅嚴重後果，同時呼籲市民要認清風險。

警方近日在新皇崗口岸拘捕一名42歲持雙程證的內地男司機，涉案豪華七人車亦被拖走扣留檢驗。

可能有人會諗：「有人肯車我，價錢啱咪得囉，做乜要搞咁多嘢？」但高人提醒，從市民自己嘅角度出發，坐「白牌車」其實係一場「搵命搏」嘅賭博，主要有兩大風險：

第一，保險隨時有機會失效，意外隨時面對索償無門。

合法嘅跨境出租車必須持有常規配額、封閉道路通行許可證同出租汽車許可證。但「白牌車」冇呢啲牌，一旦發生交通意外，提供非法服務嘅車輛，佢嘅第三者責任保險係有可能會失效。即係話，如果坐白牌車出事受傷，甚至造成傷亡，你有機會追究無門，無法獲得應有嘅賠償。為咗貪一時方便，將自己同家人嘅安全較飛，值唔值得咩？

第二，罰則極重，唔好以為只係抄牌咁簡單。

根據《道路交通條例》第374章第52(3)條，無牌載客屬刑事罪行。警方會用「放蛇」方式去蒐證，亦會喺口岸一帶同黑點加強巡邏。一旦斷正，首次定罪最高罰款港幣10,000元、監禁6個月，車牌吊銷6個月；如果再犯，最高罰款25,000元、監禁12個月，車牌吊銷12個月。涉案車輛喺吊銷牌照期間要交畀運輸署保管，司機更會被停牌最少12個月至3年。運輸署仲會撤銷埋涉事車輛嘅封閉道路通行許可證。如果涉及內地司機，警方仲會查埋係咪非法勞工或者違反逗留條件，轉交內地執法部門跟進。

其實皇崗口岸嘅交通配套正逐步完善，港九新界都有合法交通工具直達，包括7條專營巴士（6條日間、1條通宵）、3條日間同3條通宵專線小巴、5條短途跨境巴士同長途跨境巴士，仲有市區的士、新界的士同車隧的士。

高人話，政府打擊「白牌車」，並唔係要阻礙大家出行，而係要守住安全底線，同時可令皇崗口岸更暢順。對市民來講，搭合法交通工具先可以保障自己同屋企人。